राष्ट्रपति प्रणली बांलागु विकल्प : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं प्रत्यक्ष निर्वाचित राष्ट्रपतीय शासन प्रणली दकलय् बांलागु विकल्प जुइगु खँ धयादीगु दु ।
संविधानसभाया शासकीय स्वरुप निर्धारण समितिया प्रतिवेदनय् जारी सहलहलय् मंगलवाः थःगु बिचाः प्वंकादिसें भट्टराईं राजतन्त्रया अभावय् न्हूगु शक्ति केन्द्रया रुपय् राष्ट्रपतियात स्थायी यायेमाःगु खँय् बः बियादिल । वयेकलं संघीयताय् केन्द्रयात बल्लाकेमाःगुलिं व निगू शक्ति केन्द्रयात सन्तुलनय् तयेगु निंतिं राष्ट्रपतियात बल्लाकेमागु तर्क तयादिल ।
वयेकलं वर्तमान संसदीय व्यवस्थायात न्ह्याकू हे कुतः याःसां सुधार याये मफइगु धायदिसें परम्परागत संसदीय प्रणलीं देशय् निकासया पलेसाः थप समस्या हइगु धयादिल । वयेकलं निरंकुश जुइमबीत राष्ट्रपतियात महाअभियोगया व्यवस्था यायेफइगु सुझाव बियादिल ।
अथेहे सहलहलय् कांग्रेस नेता मिनेन्द्र रिजालं प्रत्यक्ष निर्वाचित राष्ट्रपति वा प्रधानमन्त्रीया व्यवस्था याःसा शक्ति केन्द्रीकरण जुइगु धयादिल । वयेकलं अज्याःगु व्यवस्था सुधार याःगु राजतन्त्र व कम्युनिष्ट शासन जुइगुलिं लोकतान्त्रिक पद्धति कथंया शासन प्रणली नालेमाःगु खँय् बः बियादिल ।
