प्यलाया दुने लडाकु समायाजेन : प्रधानमन्त्री
प्रधानमन्त्री माधवकुमार नेपालं प्यलाया दुने माओवादी लडाकु समायोजन यायेगु खँ धयादीगु दु । वयेकलं लडाकु समायोजन व न्हूगु संविधान छगू हे इलय् क्वचाइगु धयादिल ।
गोकर्ण-डाँछी बागमती पुलया सोमवाः येँय् सिलन्यास यानादिसें प्रधानमन्त्री नेपालं माओवादी लडाकुया समायोजन ज्या प्यलाया दुने पूवंकेत सरकारं तयारी यानाच्वंगु धयादिसें लडाकु समायोजन जुइवं न्हूगु संविधान जारी जुइगु धयादिल ।
वयेकलं समायोजन बारे विशेष दस्तावेज तयारीय झ्वलय् दुगुलिं दस्तावेज पूवनेवं लडाकु समायेजन व पुर्नस्थापन जुइगु नं शुरु जुइगु धयादिल । वयेकलं समायोजन लिपा लडाकु नं राष्ट्रिय सेना जुइगुलिं उमिगु स्वापू माओवादी नाप त्वादलीगु धयादिल । वयेकलं समायोजन लपा लडाकुतय्सं विद्रोही म्ये हालेमदइगु व उकिया पलेसाः शान्ति व सिर्जनाया म्ये हालेमाःगु धयादिल । अथेहे वयेकलं लाडकुतय्सं माओवादी नेताया फोटा नं ज्वना जुइमदइगु धयादिल ।
प्रधानमन्त्रीं माओवादीयात त्रासया राजनीति त्याग यायेत इनाप यानादिसें त्रासया राजनीति याइपिंनि बागमतीलय् अवसान जुइगु धयादिल । वयेकलं इलय् हे संविधान निर्माण जुइगु विश्वास प्वंकादिसें सहमति, सहकार्य व एकतापाखें हे न्हूगु संविधान जारी जुइगु धयादिल ।
