इनरुवाय् फोरमया मसाल जुलुस
स्वायत्त मधेश प्रदेशया माग यानाः आन्दोलन यानाच्वंगु मधेशी जनअधिकार फोरम नेपालं सोमवाः सनिलय् सुनसरीया सदुरमुकाम इनरुवाय् मसाल जुलुस प्रदर्शन याःगु दु ।
सरकार व मंकाः मधेशी मोर्चा दथुइ न्हापाः जूगु माग कार्यान्वयन यायेमाःगु नापं मधेशीतय् माग प्रति सरकार गम्भीर मजूगु धासें छवाः न्ह्यः निसें विरोधय् कुहांवःगु फोरमया कार्यकर्तातय्स संविधानसभाया राज्य पुनःसंरचना समितिं न्ह्यब्वःगु प्रस्तावया नं विरोध यासें मसाल जुलुस पिथंगु खः ।
स्थानीय अस्पताल चोक स्थित जिल्ला पार्टी ज्याकू न्ह्यने पाखें पिहांवःगु मसाल जुलुस इनरुवाया थीथी थाय् परिक्रमा यानाः बस चोकय् थ्यंकाः कोणसभाय् परिणत जूगु खः । कोणसभायात फोरमया सभासद् सबिता यादव, फोरम जिल्ला अध्यष एसएन मेहता लगायत नेतातय्सं समग्र मधेश छगू स्वायत्त प्रदेशया माग पूमवंकूसाः मधेशी समुदायं विद्रोह यायेगु ख्याच्वः ब्यूगु खः ।
