नेवाः प्रदेश दयाः स्वनिगः पिनेया नेवाःत लय्ताः
येँ (सन्ध्या टाइम्स)/राज्य पुनर्संरचनाया झ्वलय् नेवाः स्वायत्त प्रदेश दइगु प्रस्ताव संविधानसभाया राज्य पुनर्संरचना नापं राज्य शक्ति बाँडफाँड समितिं तयार याःगु हुनिं स्वनिगलं पिने थीथी जिल्लाया नेवाःत लय्ताःगु दु ।
नेवाःतय्गु राष्ट्रिय संगठन नेवाः देय् दबूपाखें संगठन विस्तार व सहलह मुँज्याया झ्वलय् स्वनिगलंपिने थीथी थासय् अभियान न्ह्याकूगु झ्वलय् अथे नेवाःत लय्ताःगु दु धकाः देय् दबूया नायः नरेश ताम्रकारं जानकारी बियादीगु दु ।
अभियानया झ्वलय् आः पथलैयाय् दीम्ह ताम्रकारं 'सन्ध्या टाइम्स'लिसे खँ ल्हासें उगु खँ कनादीगु खः। पिनेयापिं नेवाःतय्सं थीथी प्रदेश दुने नेवाःतय्गु अधिकार छु जुइ धकाः जिज्ञासा तयेगु यानाच्वंगु खँ वय्कलं कनादीगु दु ।
देय् दबूया अभियानया झ्वलय् नेपाःया तराई लागाय् च्वनाच्वंपिं नेवाःत धाःसा मधेश आन्दोलनं पीडित जूगु नापं यक्व हे नेवाःत विस्थापित तकं जूगु दुःख नं अनया नेवाःतय्सं प्वंकूगु दु ।
देय् दबूपाखें नेवाःतय्गु हक अधिकार, नेवाः स्वायत्त प्रदेश नापं थीथी पक्षयात कयाः धरान, मोरङ, इटहरी, लहान, जनकपुर, लालगढय् सहलह मुँज्या न्ह्याकेधुंकूगु दुसा थौं पथलैया व वीरगंजय् थ्व अभियान न्ह्याकी। थ्वहे झ्वलय् देय् दबूया मोरङ जिल्ला अधिवेशन वंगु ९ गते क्वचाःगु दुसा उगु अधिवेशनं देवेन्द्र कुमार मास्केया नेतृत्वय् न्हूगु ज्यासना पुचः दयेकूगु दु ।
