दगु बहालय् बसन्त पञ्चमि ज्याझ्वः

वंगु श्रीपञ्चमि कुन्हु असंया भिंतुना गुथिया ग्वसालय् निक्वःगु भिंतुना बसन्त उत्सव जुल। ज्याझ्वलय् नेवाः संगीत व साहित्य न्ह्यब्वयेगु न्ह्यइपुगु ज्या जूगु खः। ज्याझ्वः दगुबहालय् जूगु खः ।

श्रीपञ्चमियात बसन्त पञ्चमि नं धायेगु याः। बसन्त ऋतुइ प्रकृतिया न्हूगु रुप पिलुइ। उकियात हे लुमंकाः उगु सांगीतिक सांस्कृतिक ज्या जूगु खः ।

ज्याझ्वलय् गोविन्द ह्युमत व मारुती भण्डारीया ज्वःम्येँ नापं विजयमान सिं तुलाधर, रामकृष्ण दुवाल, रिता महर्जन, नगिना जोशी, शिव शाही, सुलिन्द्र शाक्य, भृगुराम श्रेष्ठ, भिम तुलाधरपिंसं म्येँ हालादीगु खः ।

ज्याझ्वःया आरम्भ धाःसा बसन्त रागय् हालातःगु बिज्याक मन्जुश्री धाःगु भजन हालाः अन्नपूर्ण ज्ञानमाला भजन खलकं याःगु खः। उकी हरिशरण साय्मि, रामकृष्ण खड्गी, सुरेन्द्र श्रेष्ठ व बालकृष्ण वंशीपिनिगु पुचलं संगीतया न्हूगु सवाः बिउगु खःसा मचाम्ह कलाकार शुभेच्छा तुलाधरं सितार थानाः न्यंकादीगु खः ।

संगीतया नापनापं ज्याझ्वलय् ह्दयप्रसाद मिश्रया ख्यालि, सुशील राजोपाध्याय, नरोत्तम मानन्धर व विनिता महर्जनपिंसं लघु नाटक न्ह्यब्वःगु खः ।

अथे हे उगु ज्याझ्वलय् जनकवि दुर्गालाल श्रेष्ठ लगायत नातिवज्र, भूषणप्रसाद श्रेष्ठ, लाभरत्न तुलाधर, शैलेश बरेजु, मोक्ष बहादुर अमात्य, पुष्परत्न 'स्वीटहर्ट' पिंसं कविता पाठ यानादीगु खः ।

प्रा. प्रेमशान्ति तुलाधर मूपाहां कथं झाःगु खःसा भिंतुना गुथिया नायः सुशीलकाजी तुलाधरं लसकुस, छ्यांज्ये रत्नवीर शाक्यपाखें ज्याझ्वः बारे जानकारी व रविरत्न तुलाधरं सुभाय् बिसें ज्याझ्वः क्वचायेकूगु खः ।

भिंतुना गुथिपाखें थगुने नं थज्याःगु न्ह्यइपुगु ज्याझ्वः यासें बसन्त पञ्चमि न्यायेकेगु ज्या याःगु खः। थ्व ज्याझ्वःयात नं नेवाः संस्कृतिया छगू अंगया रुपय् कयाः दँय्दसं हे थज्याःगु ज्याझ्वः याना वनेगु खँ गुथिं धाःगु दु। गुथिं असं लागाय् जुइगु थीथी सांस्कृतिक ज्याझ्वलय् ब्वति कयाः उकियात तःजिकेगु कुतः याना वयाच्वंगु दु ।