'जनमुक्ति सेना व माओवादीया स्वापू मदयेमाः'
येँ (सन्ध्या टाइम्स)/प्रधानमन्त्री माधवकुमार नेपालं सेना समायोजन जुइ न्ह्यः एकीकृत नेकपा (माओवादीं) नेपाली सेनाया चरित्रय् क्षति मयाइगु विश्वास यायेबहःगु प्रतिवद्धता प्वंकेमाः धयादीगु दु ।
न्याद्वःम्ह जक जनसेनायात समायोजन याइगु धकाः चर्चा जुयाच्वंगु इलय् प्रधानमन्त्रीं उगु कथं शर्त तयादीगु खः। भारतया संचार संस्था पीटीआईनापया खँल्हाबल्हाया झ्वलय् वय्कलं अथे धयादीगु खः ।
अन्तर्वार्ताया झ्वलय् वय्कलं एनेकपा (माओवादी) या जनसेनां सरकारया तलब भत्ता कयाच्वंगु जुयाः इपिं माओवादी पार्टी विशेष मजुसे वर्तमान सरकारप्रति हे उत्तरदायी जुइमाः धकाः नं धयादिल ।
नेपाली सेनायात विश्वास यायेमाः धयादिसें वय्कलं माओवादीया जनसेनाया रेखदेख, समायोजन व पुनः स्थापना सम्बन्धी विशेष समितिं ज्या याः कथं हे जुइ धकाः नं धयादिल। उगु विशेष समितिया कजि जुयादीम्ह प्रधानमन्त्री नेपालं नेपाली सेनाया व्यवसायिकता व निष्पक्षताय् सुं लिसे नं सम्झौता याये फइ मखु धकाः नं धयादीगु दु ।
लिपांगु इलय् वयाः रक्षा मन्त्री विद्यादेवी भण्डारीं थः रक्षा मन्त्री जूगुलिं थःगु सहमति मजुइकं माओवादीया जनसेना समायोजन याये फइ मखु धकाः सार्वजनिक रुपं हे अभिब्यक्ति बियादीवं प्रधानमन्त्री नेपाल नं सेना समायोजन यायेगु जुइ धकाः सार्वजनिक रुपं अभिब्यक्ति बीत बाध्य जुयावःगु खः। लुमंकेबहः जू वंगु छुं दिं न्ह्यः जक च्वंगु सेना समायोजन विशेष समितिया मुँज्याय् रक्षा मन्त्रीया अभिब्यक्तियात कयाः कचमच जुयाः छुं हे खँ क्वःछी मफुगु खः ।
