संघीयतां देय् कमजोर जुइमखु : प्रधानमन्त्री
प्रधानमन्त्री माधवकुमार नेपालं संघीय प्रणालीइ वनेवं देय् कमजोर मजुइगु खँ धयादीगु दु । वयेकलं बरु संघीयतां देय् समृद्ध व एकताबद्ध जुइगु धयादिल ।
सदभावाना पार्टीया पुलांम्ह अध्यक्ष गजेन्द्रनारायण सिंहया च्याक्वःगु स्मृति दिवसया झ्वलय् सदभावना पार्टीं येँ या:गु श्रद्धाञ्जली ज्याझवलय् न्वावादिसें प्रधानमन्त्री नेपालं देय् संघीय प्रणलीलय् वनेगु धइगु देय्यात कमजारे दयेकेगु मखु धयादिसें थुकीं देय्यात अझ अप्वः बल्लाकेत, एकताबद्ध व समृद्ध यायेत नेपाः संघीयतालय् वनेत्यंगु धयादिल ।
वयेकलं विश्वया मेगू देशं भोगे यायेमाःगु नकारात्मक पाठ पाखें शिक्षा कयाः व सकारात्मक पक्ष पाखें प्रेरणा कयाः नेपाः संघीयता पाखे वनाच्वंगु धयादिल । वयेकलं नेपाः संघीयताय् वनेत्यंगू न्हूगु देय् जूगुलिं यक्व देय्या संघीय प्रणाली पाखें शिक्षा कायेफइगु नेपाःया निंतिं फाइदाया खँ जूगु कनादिल ।
म्हिग तक राजतन्त्रया नेतृत्वय् एकात्मक व केन्द्रीकृत शासन प्रणली जूगुलिं देशय् न्यायोचित विकास जुइमफुगु धयादिसें प्रधानमन्त्री नेपालं गणतन्त्रय् दक्वं क्षेत्र, जाति, भाषा, समुदाय, लिंग व वर्गया जनातया समान आशा व अपेक्षा स्वानाच्वंगु धयादिल ।
अथेहे वयेकलं संविधान दयेकेत प्यला जक ल्यं दनीगुलिं उकी न्ह्यः हे माओवादी लडाकुयात समायोजन व पुस्थापना यायेमाःगु खँय् बः बियादिल । वयेकलं लडाकुया रुचि, मापदण्ड, योग्यता व राजनीतिक दलत दथुइया सहमतिया आधारय् सुरक्षा निकायलय् समायेजन यायेत व ल्यं दूपिंत पुनःस्थापन यायेत सकार तयार जूगु धयादिल ।
