वर्तमान सरकार परिवर्तन जुइमखु : सुजाता
उपप्रधान नापं परराष्ट्रमन्त्री सुजाता कोइरालां वर्तमान गठबन्धन सरकार परिवर्तन मजुइगु दाबी यानादीगु दु । वयेकलं उच्चस्तरीय राजनीतिक संयन्त्र गठन जुइधुंकूगुलिं दक्वं समस्या समाधान थ्वहे संयन्त्र पाखें जुइगु धयादिसें आः सरकार परिवर्तन जुइगु सम्भावना मदुगु धयादिल ।
आइतवाः विराटनगरय् च्वंगु कोइराला निवासय् संचारकर्मीत नाप खँल्हाबंला यानादिसें वयेकलं अज्याःगु उच्चस्तरीय संयन्त्रया बारे विदेशीत नाप समन्वय यायेमालीगुलिं उकी परराष्ट्रमन्त्रीयात नं दुथ्याकेमाःगु तर्क तयादिल ।
अथेहे उच्चस्तरीय राजनीतिक संयन्त्रं वर्तमान राजनीतिक समस्याया अन्त्य यानाः शान्ति प्रकृयायात निष्कर्षय् थ्यंकेगु व संविधान निर्माण यायेगु ज्या याइगु कनादिल । देय्या वर्तमान संक्रमणकालय् शान्ति प्रकृया, राजनीतिक गतिरोध अन्त्य यायेगु नापं संविधान निर्माण यायेगु लगायत दक्वं समस्याया निकास बीत माओवादी लगायत राजनीतिक शक्तित दथुइ सहमित व सहकार्यया विकल्प मदुगु धयादिल ।
