अमेरिकाय् घ्यः चाकु संल्हु
नेवाः भाय् नेवाः तजिलजि व नेवाः कला थपू यायेगु व नेवाः नेवाः परस्पर ग्वाहालि यायेगु आज्जु ज्वनाः घ्यः चाकु संल्हुया लसताय् अमेरिकाया शिकागोय् च्वपिं छपुचः जानाः नेवाःत मुनेगु ज्या जुल ।
भाजु केशरमान ताम्रकारं न्ह्याकादीगु थुगु नेवाः मुनाय् दकलय् थकालिपिं भाजु नूतन श्रेष्ठं सिन्हः व मय्जु गंगा प्रधानपाखें चसु प्वालय् चिकं तिकाः अले मय्जु ज्ञानु श्रेष्ठ व मय्जु विद्या श्रेष्ठपाखें सगं बीगु ज्या जूगु खः। उगु नेवाः मुनाय् नेवाः म्येँ, नेवाः हुलाप्याखं, बाँसुरीया धुन लिसेलिसें नेवाः भाय्, नेवाः संस्कृति व नेवाः इतिहासया बारे श्याम श्रेष्ठ, नुतन श्रेष्ठ, सर्वज्ञधर तुलाधर, प्रवन रञ्जित, बिबेक श्रेष्ठ, श्रद्धा श्रेष्ठ व निम्बस श्रेष्ठपिंसं थःथःगु नुगः खँ प्वंकादीगु खः ।
ज्याझ्वलय् दकलय् लिपांगु ब्वय् झ्वः भ्वय् नकेगु ज्या जूगु खःसा शिकागोय् याकनं छगू नेवाः भाय्या कक्षा संचालन यायेमाःगु सकसिनं वाः चायेकूगु दु ।
ज्याझ्वलय् डा. जुनुकमल तुलाधरं ज्याझ्वःया ग्वसाः ग्वयादीगुलिं ग्वसाः खलःयात सुभाय् देछानादिल ।
