अंग्रेज फौजयात बुकूगु सिन्धुलीगढीय् माओवादीया सभा

येँ (सन्ध्या टाइम्स)/राष्ट्रिय स्वाधिनताया अभियान कथं देय्न्यंकं थाय् थासय् विरोध सभा यायेगु झ्वलय् थौं सनिलय् सिन्धुली जिल्लाया सिन्धुलीगढीइ नेवाः व ताम्सालिङया मंकाः सभा यायेगु तयारी जुयाच्वंगु दु। थौं न्हिनय् माओवादीया नायः प्रचण्ड मूपाहां जुयादीगु उगु ज्याझ्वलय् माओवादीया मेमेपिं नेतातय्सं नं न्ववानादीगु ज्याझ्वः दु।
उगु अभियान अन्तर्गत दकलय् लिपायागु सभा थौं राष्ट्रिय स्वाधिनता नाप स्वापू दुगु लागा सिन्धुलीगढी लागाय् यायेत्यंगु खः धकाः माओवादीया छम्ह नेतां धयादीगु दु।
सिन्धुली जिल्लाया सिन्धुलीगढी लागा धइगु विक्रम संवत् १८२४ सालय् नेपाःमितय्सं तत्कालिन अंग्रेज फौजयात न्हापांखुसी बुकूगु लागा खः। मल्ल जुजु व शाह जुजुपिनिगु दथुइ ल्वापु जुयाच्वंगु इलय् लबः कायेत अंग्रेजया नीप्यसः फौज वःगु खःसा अबलय् सिन्धुलीगढी लागाय् ल्वापु जुयाः झिंखुसः अंग्रेज सेना सीगु व ल्यंदुपिं बिसिउँ वंगु खः ।

ल्वापुया झ्वलय् नेपाःमितय्सं गुँइ च्वय् च्वनाः अप्पा व ल्वहं कुर्का छ्वःगु नापं अंग्रेज फौज जंगलं वंबलय् जंगली हां न्यानाः व न्हाय्कनं पुनाः नेपाःया झंगःत नापं घाँय् तकं अंग्रेजया विरुद्ध दु धकाः तायेकाः ग्यानाः हे बिसिउँ वंगु खः धाइ। उगु ल्वापुइ लाना खुसः नेपाःमित नं सीगु खः।
न्हापांखुसी अंग्रेज सेनायात नेपाःमितय्सं बुका छ्वःगु जुयाः अबलय् निसें हे नेपाःया राजनीतिक इतिहासय् सिन्धुलीगढीयात राष्ट्रिय स्वाधिनता नाप नं स्वाका कायेगु याना वयाच्वंगु खःसा व हे खँयात लुमंकाः माओवादीं थौं अन सभा यायेत्यंगु खः ।