२५ गते थरुहट तराइ बन्दया घोषणा
येँ (सन्ध्या टाइम्स)/थारु कल्याणकारी सभां थरुहट राज्यया माग यासे वइगु माघ २५ गते थरुहट तराई बन्दया घोषणा याःगु दु ।
संविधानसभाया राज्य पुनर्संरचना नापं राज्य शक्ति बाँडफाँड समितिपाखें तयार याःगु झिंप्यंगू प्रदेशया प्रस्तावयात विरोध यानाः थारु कल्याणकारी सभां आन्दोलनया घोषणा याःगु खः ।
थौं छगू विज्ञप्ति पिथँसे माघ महिनाय् संविधानसभायात खबरदारी यायेगु नापं भण्डाफोर यायेगु, वइगु माघ ११ गते संविधानसभाया राज्य पुनर्संरचना नापं झिंन्यागू समितिं तयार याःगु थःथःगु अवधारणापौयात येँय् छक्वलं च्याकेगु, २४ गते देय्न्यंकं मसाल जुलुस पिकायेगु नापं २५ गते थरुहट तराई लागा बन्द यायेगु घोषणा याःगु खः। सभाया महामन्त्री राजकुमार लेखीं 'सन्ध्या टाइम्स'लिसे खँ ल्हासें न्हापांगु चरणया आन्दोलनं माग पूरा मजुल धाःसा अझ सशक्त कथं निगूगु चरणया आन्दोलन यायेगु जानकारी बियादीगु दु ।
