'उच्च संयन्त्रया आशा याःसां भर याये मजिउ'

येँ (सन्ध्या टाइम्स)/ उच्च स्तरीय राजनीतिक संयन्त्रपाखें देय् व जनताया नितिं छुं याइ धकाः आशा याःसां भर याये मजिउ धकाः बुद्धिजीवीतय्सं धयादीगु दु। थौं सुथय् 'सन्ध्या टाइम्स'लिसे खँ ल्हासें वय्कःपिंसं अथे धयादीगु खः। प्रा. कपिल श्रेष्ठं विश्वासया संकट जुयाच्वंगु अवस्थाय् उच्चस्तरीय राजनीतिक संयन्त्रपाखें यक्व आशा यायेमजिउ धकाः धयादीगु दु
।
वय्कलं उगु संयन्त्रया भरय् इलय् हे संविधान दयेके फइगु खँय् शंका दु धयादिसें आःया अवस्था स्वयेबलय् नेपाःया राजनीतिक भविष्य हे अन्यौलय् दु धकाः नं धयादिल। श्रेष्ठं राजनीतिक दलया नेतातय्सं हे देय् गुखेपाखे वनाच्वंगु धकाः मसिउ नापं कन्हय् छु जुइ धकाः सीके फयाच्वंगु मदु धकाः दावी नं यानादिल ।

बुद्धिजीवी डा. राममान श्रेष्ठं धयादिल 'समस्या समाधानया नितिं आशा याःसां भरय् च्वने मजिउ।' अथे हे नागरिक आन्दोलनया न्ह्यलुवा नापं बुद्धिजीवी डा. मथुराप्रसाद श्रेष्ठं लोकतान्त्रिक जनआन्दोलनया म्याण्डेट धइगु सहमतिया संस्कृतियात लोकतान्त्रीकरण याना प्रगतीपाखे यंकेगु व इलय् हे संविधान दयेकेगु खः उकिं थ्व पक्षयात ध्यानय् तयाः संयन्त्र न्ह्याः वनेमाः धकाः धयादिल ।