कर्मचारीतय्त अवकाश बीगु तयारी क्वचाल
येँ (सन्ध्या टाइम्स)/सरकारं बुटवल धागो कारखानाया कर्मचारी व मजदुरतय्त दक्वं सुविधा सहित अवकाश बीगु निंतिं याःगु तयारी पुरा जूगु दु ।
सरकारं कारखानाया प्यसः व झिगुम्ह कर्माचारी व मजदुरतय्त अवकाश बीत्यंगु खः ।
अर्थ मन्त्रालयं अवकाश बीगु इलय् कर्मचारी व मजदुरतय्त बीमाःगु पीन्हय्गू करोड नीनिगू लख तका दां नं निकास यायेधुंकूगु खँ कारखानाया छम्ह उच्त अधिकृतं जानकारी बिउगु दु ।
अवकाश काइपिं मजदुर व कर्मचारीतय्त आःतकया ल्यं दुगु तलब, संचयकोष, वीमा व वासः खर्च, उपदान, क्षतिपूर्ति सहित यायेबलय् छम्हेसियां म्होतिइ नं झिगू निसें नीनिगू लख तक दां प्राप्त याइ ।
थनिं नीन्हय्दँ न्ह्यः चीन सरकारया ग्वाहालिइ ख्वीगू करोडया लगानीइ संचालन जूगु उगु सुका कारखानाया २०४७ सालय् वयाः जक उत्पादन शुरु याःगु खः ।
