संविधान निर्माण कार्यतालिकाय् हानं संशोधन
संविधानसभा अर्न्तगतया विषयगत समितितय्सं थःगु प्रतिवेदन इलय् हे लःल्हाये मफेवं संविधान निर्माणया कार्यतालिकाय् हानं संशोधन याःगु दु । समान्य परिवर्तन सहित कार्यतालिका गुक्वःगु पटक संशोधनय् जूगु दु ।
झिंछगू विषयगत समिति मध्ये राज्य पुनःसंरचना समिति व शासकीय स्वरुप निर्धारण समितिया प्रतिवेदनय् सहलह याये ल्यं दुगुलिं माघ ७ गते दुने क्वचायेकेमाःगु पूर्व निर्धारित ईयात आः माघ २१ गते तकया समयावधि क्वछिउगु दु । थ्वस्वयां स्ववाः न्ह्यः जक च्याक्वःगु पटक संशोधित कार्यतालिका कथं माघ ७ गते दुने दक्वं समितिया प्रतिवेदनय् संविधानसभाय् सहलह याये सिधेयेकेगु ई क्वछीउगु खः ।
संशोधित कार्यतालिका कथं संविधानया प्रारम्भिक मस्यौदा बारे जनताया राय सुझाव संकलन व सुझाव प्रतिवेदन संविधानसभाय् लःल्हायेगु समयावधियात निवाःया ई कटौति यानाः छवाः दयेकूगु दु ।
अथेहे संविधानसभा कार्य व्यवस्था समितिया आइतवाः च्वंगु बैठकं विषयगत समितिया मस्यौदाय् सहलह याना: दक्वं प्रतिवेदन संविधानसभां पारित यानाः संवैधानिक समितिलय् लःल्हायेगु थासय् बिस्कं बिस्कं रुपं नं छ्वये फइगु व्यवस्था दुथ्याकूगु दु । थीथी समितिया प्रतिवेदनय् सहलह यायेगु ज्या अझ ल्यं दनीगुलिं संवैधानिक समितिया ज्यायात नं समानान्तर रुपं न्ह्याकेत नियमावली संशोधन याःगु खः ।
