न्हू सतकय् गोली चलेजुल
येँया तस्कं व्यस्त न्हू सतकय् च्वंगु विशालबजारया भूमिगत पार्किङ स्थलय् आइतवाः सुथय् लुटेरातय्सं गोली चलेयाःगु दु ।
आइतवाः सुथय् पार्किङ स्थलय् थःगु गाडी पार्क यानाः पसः वनेत्यंगु इलय् लुटेरातय्सं लुँ व्यवसायी प्रकाश राजभण्डारीयात लुटे यायेगु ताः तयाः गोलीं चले याःगु खँ जनसेवा प्रहरीं धाःगु दु । व्यापारी राजभण्डारी व वय्कःया जहान लिपिसा राजभण्डारीयात म्हसिउपिं मनूतय्सं गोलीं कयेकाः उमिके च्वंगु ब्याग छगः लाकाः बिसिउँ वंगु खः । न्ह्यावले थें आइतवाः नं पसः वने न्ह्यः थःगु गाडी विशालबजारया भूमिगत पार्किङय् पार्क यानाः पसः वनेत्यंगु इलय् लुटेरातय्सं गोलीं क्यकूगुलिं थ्व घटना योजनाबद्ध तरिकां या:गु जुइफुगु खँ प्रहरीं धाःगु दु ।
लुँ व्यवसायी राजभण्डारीयात गोलीं क्येकाः लुटे यायेगु कुतः असफल जुइवं बा. २२. प. ९५८३ नम्बरया मोटरासाइकलय् च्वना निम्ह लुटेरात बिस्यूवंगु खः । प्रहरीं घटनाय् निम्ह जक लुटेरातय् संलग्ना दुगु धाःसां प्रत्यक्षदर्शीतय्सं पार्किङ स्थल दुने गोलीं क्येकूपिं निम्ह व पिने नं मेम्ह ग्वाहालिमी दुगु खँ धाःगु दु ।
जनसेवा प्रहरी प्रभागं सछि मिटरय् दुगु पार्किङ स्थलय् उगु घटना जूगु खः ।
