संयन्त्रया सक्रियातां गतिरोध ज्यनी : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' उच्चस्तरीय राजनीतिक संयन्त्रं वर्तमान राजनीतिक गतिरोध ज्यंकेगु विश्वास प्वंकादीगु दु । वयेकलं शान्ति प्रकृया व संविधान निर्माणय् खनेदुगु गतिरोधया निंतिं संयन्त्रय् जूगु सहलह पाखें राजनीतिक जटिलता ज्यंकीगु संकेत खनेदुगु धयादिल ।
येँया गोकर्णय् निर्माण जूगु सहिक पार्कया शनिवाः उल्लेज्या यानादिसें वयेकलं संयन्त्र निर्माणं आम जनताय् न्हूगु रक्त संचार जूगु धयादिसें संविधान च्वयेगु ज्या व शान्ति प्रकृया सफल दयेकेत वातावरण तयार जुयाच्वंगुलिं थुकीयात ग्वहालि यायेत दक्वसितं इनाप यानादिल ।
वयेकलं संविधानसभाया निर्वाचनय् जनतां ब्यूगु म्याण्डेट कथं न्ह्याः वंसाः समृद्ध नेपाः निर्माण यायेफइगु बिचाः प्वंकादिल । वयेकलं संविधानसभाया दकलय् तःधंगु दल माओवादी विरुद्ध षड्यन्त्र यायेगु धइगु लोकतन्त्र व शान्ति प्रकृया विरुद्ध जूगु नं धयादिल ।
