रक्षामन्त्रीयात बर्खास्त याः : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं सेना समायोजनया खँय् विवादास्पद अभिव्यक्ति बियादीम्ह रक्षामन्त्री विद्यादेवी भण्डारीयात पदं बर्खास्त यायेत माग यानादीगु दु । वयेकलं रक्षामन्त्रीया विवादास्पद अभिव्यक्तियात व्यक्तिगत धासें सरकार बिस्यूंवने दइमखु धयादिसें पदं हे बर्खास्त यायेमाः धयादिल ।
क्रान्तिकारी पत्रकार संघ तमुवान समितिं शनिवाः पोखराय् याःगु पत्रकार सम्मेलनय् न्ववानादिसें वयेकलं माओवादी नेतृत्वया राष्ट्रिय मंकाः सरकार गठन मजुतल्ले संविधान निर्माण मजुइगु व शान्ति प्रकृयायात निष्कर्षय् नं थ्यंकेमफइगु धयादिल । संविधानसभा पाखें संविधान निर्माण यायेत व सेना समायोजन मजूतल्ले शान्ति प्रकृया निष्कर्षय् मथ्यनीगु धयादिसें वयेकलं थःगु पार्टीया नेतृत्वया सरकार बिना छुं नं ज्या जुइमफइगु दाबी यानादिल ।
वयेकलं शान्ति प्रकृयायात निष्कर्षय् थ्यंकेत द्वन्द्व जूगु छुं देशय् थें विद्रोही शक्तियात नं राज्यया बछि शक्ति बीमाःगु धयादिल । वयेकलं माओवादी शान्ति प्रकृयाया बछि हिस्सा जूगुलिं राज्य शक्ति नं बराबर जुइमाःगु खँ धयादिल । वयेकलं अथे मजूसाः शान्ति प्रकृया निष्कर्षय् मथ्यनीगु धयादिसें राजनीतिक दलत अज्याःगु हे परिस्थिति ब्वलंकाः माओवादीयात याकचा दयेकेत स्वयाच्वंगु द्वपं बियादिल ।
राजनीतिक गतिरोध ज्यंकेत गठन जूगु उच्चस्तरीय राजनीतिक संयन्त्रय् माओवादीं न्ह्यने सारे याःगु राष्ट्रपतिया पलाःया विषयलय् सहलह जूगुलिं थःपिंसं आमहड्तालया आन्दोलन लित कायाःगु धयादिल । वयेकलं संयन्त्रय् नं थुकीया विषयलय् निकास पिकाये मफुसाः सशक्त आन्दोलन यायेगु ख्याच्वः बियादिल ।
