संयन्त्रय् दक्वं दलयात दुथ्याकेत प्रमया इनाप
प्रधानमन्त्री माधवकुमार नेपालं उच्चस्तरीय राजनीतिक संयन्त्र प्रति थः सकारात्मक दुसां थुकीयात स्वंगू दलया जक संयन्त्र मदेयेकूसें दक्वं प्रमुख दलयात दुथ्याकेत इनाप यानादीगु दु ।
शनिवाः सुथय् नेपाली कांग्रेसया सभापति गिरिजाप्रसाद कोइराला व नेकपा (एमाले)या अध्यक्ष झलनाथ खनाल नाप जूगु खँल्हाबंलाय् वयेकलं थंज्याःगु बिचः प्वंकादीगु खः । प्रधानमन्त्री नेपालं शान्ति प्रकृयायात सार्थक निष्कर्षय् थ्यंकेत व निर्धारित इलय् हे न्हूगु संविधान जारी यायेत दलत दथुइ गठन जूगु थंज्याःगु संयन्त्र प्रति थः सकारात्मक जूगु धयादिल । अथेहे वयेकलं संयन्त्रय् संसदय् प्रतिनिधित्व याइगु दक्वं प्रमुख दलतय्त संयन्त्रय् समावेश याःसा सहमति यायेत अपूइगु बिचा: प्वंकादिल ।
कोइराला निवास महाराजगंजय् दुगु खँल्हाबंलाय् सभापति कोइराला व एमाले अध्यक्ष खनालं प्रधानमन्त्री नेपालयात शुक्रवाः जूगु उच्चस्तरीय राजनीतिक संयन्त्रया बैठक व उकीया निर्णयया बारे जानकारी ब्यूगु खः ।
अथेहे उगु इलय् प्रमुख सत्तारुढ दलत एमाले व कांग्रेस दथुइया एकतायात अझ क्वातुकेगु सहमति जूगु दु । उकीया निंतिं मूलभूत विषयलय् एकमत कायम यायेत निगू दलया दथुइ कार्यदल निर्माण यानाः ज्या न्ह्याकेगु सहमति नं नेतात दथुइ जूगु दु ।
