माओवादी पाखें आमहड्ता स्थगित
एकीकृत नेकपा (माओवादीं) प्यंगूगु चरणया आन्दोलन कथं माघ १० गते निसें घोषणा यानातःगु अनिश्चितकालीन आमहड्ताल स्थगित याःगु दु ।
शुक्रवाः च्वंगु उच्चस्तरीय राजनीतिक संयन्त्रया बैठकय् कार्यविधि पारित जुइवं थीथी राजनीतिक दलया नेतातय्सं बन्द लितकायेत याःगु इनाप कथं माओवादीं आमहड्ताल स्थगित याःगु खः । संयन्त्रया बैठक लिपाः माओवादी अध्यक्ष पुष्पकमल दाहाल 'प्रचण्ड'या न्हू बजारय् दुगु छेँय् च्वंगु केन्द्रीय पदाधिकारीतय् बैठकं आःयात अनिश्चितकाली आमहड्तलया आन्दोलन स्थगन यायेगु निर्णय याःगु खः ।
माओवादी पदाधिकारीतय् बैठक लिपाः अध्यक्ष प्रचण्डं छगू प्रेस विज्ञप्ति पिथनादिसें उच्चस्तरीय राजनीतिक संयन्त्रपाखें राजनीतिक सहमति पिहांवइगु विश्वासया साथ बन्द स्थगित यानाःगु खँ न्ह्थंनातःगु दु । विज्ञप्तिइ अनिश्चितकालीन आम हड्तालया आन्दोलन लित काःसां राष्ट्रिय स्वाधीनता व नागरिक सर्वोच्चताया निंतिं पार्टीं यानाच्वंगु देयन्यंकया अभियान धाःसाः जारी तुं जुइगु खँ धयातःगु दु ।
माओवादी अध्यक्ष प्रचण्डं शुक्रवाःया राजनीतिक संयन्त्रया बैठकय् संयन्त्रया कार्यविधि पारित जूगु नापं राष्ट्रपतिया पलाः पाखें जुयाच्वंगु विद्यमान राजनीतिक गतिरोधया अन्त्यया विषययात न्हापांगु कार्यसूचीलय् तयाः सहलह जूगु धयादिसें थुकीं राजनीतिक गतिरोधया निंतिं याकनं हे सहमति निर्माण याइगु नापं शान्ति व संविधान निर्माणया पक्षय् सकाराम्कत निष्कर्ष व भूमिकाया अपेक्षा यासें माघ १० गते निसेंया अनिश्चितकाली आम हड्तालया स्थगित यानाःगु खँ शुक्रवाः पिथंगु प्रेस विज्ञप्ति न्ह्यथंनातःगु दु ।
