रक्षामन्त्री भण्डारीं राजीनामा बीमाः : झाँक्री
नेकपा (एमाले)या विद्यार्थी संगठन अनेरास्ववियुया अध्यक्ष रामकुमार झाँक्रीं थःगु हे पार्टी पाखें रक्षामन्त्री जुयादीम्ह विद्यादेवी भण्डारीयात सरकारय् च्वनेगु अधिकार मदुगु धयादिसें तत्काल राजीनामा बीमाःगु खँ धयादीगु दु ।
प्रेस चौतारी पाल्पा शाखं शुक्रवाः तानसेनय् याःगु पत्रकार नापलायेगु ज्याझ्वलय् वयेकलं प्रधानमन्त्री पद्धतिलय् प्रधानमन्त्रीं धाःगु खँ हे जुइगु धयादिसें प्रधानमन्त्री नाप फरक मत तयाः न्ववानाजुइपिंत सरकारय् च्वनेगु छुं हक मदुगु धयादिल । वयेकलं प्रधानमन्त्री पद्धतिलय् प्रधानमन्त्रीं हे धाःगु मन्यनीगुसाः छुनां धाःगु न्यनेगु धकाः न्ह्यसः नं तयादिल ।
वयेकलं रक्षामन्त्रीं सेनायाता विवादय् ह्येगु ज्या यानाच्वंगु व सेनाय् राजनीतिकरण यायेत स्वःगु द्वपं नं बियादिल ।
अथेहे वयेकलं सरकार व पार्टी नेतृत्व याइपिंसं हे संविधान निर्माण जुइमखु धकाः सार्वजनिक रुपं न्ववायेगु गैरजिम्मेवार जुयाच्वंगु द्वपं बियादिल । नापं वयेकलं राजनीतिक गतिरोध अन्त्यया निंतिं गठन जूगु स्वंगू दलया संयन्त्रयात विरोध याइपिंत नं दक्षिणपन्थीया संज्ञा बियादिल । वयेकल संविधान निर्माणया निंतिं अनेरास्ववियुं माघ १० गते निसें देशव्यापी दवाव बीगु जानकारी बियादिल ।
