संयन्त्रया कार्यविधि पारित

उच्चस्तरीय राजनीतिक संयन्त्रया शुक्रवाः च्वंगु बैठकं संयन्त्रया कार्यविधि पारित याःगु दु । प्रमुख स्वंगू दलया शीर्ष नेतात दुथ्याःगु संयन्त्रया कार्यविधि पारित जुइवं राजनीतिक गतिरोध अन्त्य जुइगु नापं संयन्त्रया ज्या यायेत अपुइगु विश्वास नेतातय्सं प्वंकूगु दु ।

कार्यविधि तय यायेत स्वंगू दलया निम्ह-निम्ह दुजः दुगु कार्यदलं थुगु कार्यविधि तयार याःगु दु ।
कार्यदलं कार्यविधि तयार यायेवं शुक्रवाः कांग्रेस सभापति गिरिजाप्रसाद कोइरालाया निवासय् च्वंगु संयन्त्रया बैठकं उगु कार्यविधि पारित याःगु खः ।

कार्यविधिलय् वर्तमान राजनीतिक गतिरोध अन्त्यया निंतिं प्रमुख राजनीतिक पार्टीत दथुइ सहमति कायम यायेगु खँयात न्हापांगु बुँदाय् तयातःगु दु ।

अथेहे कार्यविधिइ शान्ति व संविधान निर्माणया निंतिं आवश्यक विषयलय् बिस्कं बिस्कं उप-समिति निर्माण यानाः सम्बन्धित निकाययात ग्वाहालि यायेगु, विस्तृत शान्ति सम्झौता व अन्तरिम संविधानया न्ह्यथनातः कथं थीथी आयोग गठन यायेत पहल यायेगु, बेपत्ता नागरिकतय् स्थिति छानविन यानाः सार्वजनिक यायेगु, कब्जा यानातःगु छेँबुँ लित बीगु, पुलांगु शान्ति सम्झौता नापं थीथी सम्झौताय् जूगु सहमतिया विषयया समीक्षा यानाः कार्यान्वयन यायेगु खँ न्ह्यथनातःगु दु ।

अथेहे संयन्त्रं आवश्यकता कथं थःगु कार्याविधि परिमार्जन यायेफइगु व संयन्त्र छुं नं निर्णय सहमतिया आधारय् यायेगु बुँदात दुथ्याकातःगु दु । नापं उगु कार्यविधि थीथी दलत दथुइ मतभेद दुसां दलया नेता व कार्यकर्तातय्सं न्ववायेगु इलय् व च्वयेगु इलय् मेपिंत द्वपं बी कथंया भाय् मछ्यलीगु आचार संहिता नं दुथ्याकातःगु दु ।

बैठक लिपाः एमाले अध्यक्ष झलनाथ खनालं गतिरोध अन्त्यया सुरुवात जूगु टिप्पणी यानादिल । अथेहे माओवादी उपाध्यक्ष नारायाणकाजी श्रेष्ठ 'प्रकाशं' नं कार्यविधिलय् जूगु सहमितं गतिरोध अन्त्यया संकेत खनेदुगु कनादिल ।

कार्यदलय् माओवादी पाखें उपाध्यक्ष प्रकाश व नेता देव गुरुङ, कांग्रेया पाखें नेतात अर्जुननरिसंह केसी व कृष्णा सिटौला व एमालेया पाखें नेतात भरतमोहन अधिकारी व युवराज ज्ञवाली च्वनादीगु खः ।