तामाङतय्सं १४ प्रदेशया नक्सा च्याकल
येँ (सन्ध्या टाइम्स)/संविधानसभाया राज्य पुनर्संरचना नापं राज्यशक्ति बाँडफाँड समितिया बहुमत दुजःतय्सं पारित याःगु झिंप्यंगू प्रदेशया राज्य पुनर्संरचनायात तामाङतय्सं विरोध याःगु दु। तामाङतय्सं संघीय गणतन्त्र नेपाः दुने तामाङ प्रदेश दइ धाःगुयात लसकुस तर सीमाया विषय धाःसा आपत्ति दु धासें थौं उगु प्रस्तावया खाका हे च्याका बिउगु दु ।
तामाङतय्गु बाहुल्यता दुगु लागा धकाः तामाङतय्सं दावी याना वयाच्वंगु धादिङ व चितवनयात नारायणी प्रदेशय् लाकूगु नापं दोलखा, रामेछाप व सिन्धुलीयात सुनकोशीइ लाकूगु प्रति आपत्ति प्वंकुसें विरोध स्वरुप तामाङतय्गु मंकाःगु मोर्चा ताम्सालिङ संयुक्त संघर्ष समितिं थौं न्हू बानेश्वरया संविधानसभाया भवन न्ह्यःने हे राज्य पुनर्संरचनाया खाका च्याका बिउगु खः ।
नेवाःत गृहकार्यय् ब्यस्त
राज्य पुनर्संरचना समितिं तयार याःगु खाकाय् नेवाः प्रदेशयात लसकुस दुसां सीमाया विषयय् धाःसा विरोध यासें नेवाः स्वायत्त राज्य मंकाः संघर्ष समितिं थ्व इलय् आः नेवाःत गुकथं न्ह्याः वनेगु धइगु विषययात कयाः गृहकार्य शुरु याःगु दु। म्हिगः नेवाः प्रदेशया सीमाया विषयस बुद्धिजीवीतलिसे सहलह ब्याकेगु ज्या याःगु उगु संघर्ष समितिं कन्हय् नं राज्य पुनर्संरचना समितिया सभासदतलिसे सहलह ब्याकीगु जूगु दु ।
