न्हूगु संघीय संरचना विरुद्ध मधेशवादी दलत छथाय्

येँ (सन्ध्या टाइम्स)/संविधानसभाया राज्य पुनर्संरचना समितिया बहुमत दुजःतय्गु अवधारणा कथं आवंलि संघीय गणतन्त्र नेपाः दुने झिंप्यंगू प्रदेश दइ धकाः तयार यानाः संविधानसभाया अध्यक्ष सुवास नेम्वाङयात लःल्हाःगु प्रस्तावयात कयाः सरकारय् दुथ्याःगु व प्रतिपक्षी मधेशवादी दलततय्सं आपत्ति प्वंकुसें थौं प्यंगू मधेशवादी दलया मंकाः बैठक च्वनाः आन्दोलनया स्वरुप तयार यायेत्यंगु दु ।

संविधानसभा राज्य पुनर्संरचना समितिं तराई लागायात निगू प्रदेशय् ब्वथलाः मिथिला-भोजपुरा-कोच-मधेश धकाः छगू व लुम्बिनी-अवध-थारुवान धकाः मेगु प्रदेश दयेकूगुलिं तराईया मधेशवादी दलतय्सं उकियात विरोध याःगु खः। मधेशवादी दलतय्सं सम्पूर्ण मधेश छगू हे प्रदेश जुइमाः धासें थ्व माग याःगु खः। प्यंगू मधेशवादी दलया नेतातय्सं १४ प्रदेशया थ्व अवधारणायात विरोध यायेधुंकूगु दुसा आः थुकियात सदन व सतकय् समेत आन्दोलनया विषय दयेकेगु बारे उमि दथुइ सहलह जुयाच्वंगु दु ।

सम्पूर्ण मधेश छगू प्रदेश मजुल धाःसा आन्दोलन यायेगु धासें प्रतिपक्ष मधेशी जनआधिकार फोरम, सरकारय् दुथ्याःगु तराइ मधेश लोकतान्त्रिक पार्टी, मधेशी जनआधिकार फोरम (लोकतान्त्रिक) व नेपाल सद्भावना पार्टीया नेतातय् दथुइ थौं सनिलय् सद्भावना पार्टीया सिंहदरवारस्थित संसदीय दलया ज्याकुथी मुँज्या च्वनेत्यंगु खः। फुक्क मधेश छगू प्रदेशया निंतिं थःपिंसं मंकाः कथं तराई लागाय् हानं आन्दोलन घोषणा यायेगु धइगु विषययात कयाः मुँज्याय् सहलह जुइ धाःगु दु। सदनय् उमिसं थुकिया विरोध यायेधुंकूगु दु ।