ग्वलया लुँध्वाखा वहध्वाखा गायब

येँ (सन्ध्या टाइम्स)/येँया ग्वलय् ३६ दँ लिपा नांजाःगु जलप्याखं क्यनेगु धकाः तयारी यानाच्वंगु इलय् अन तयेमाःगु लुँध्वाखा व वहध्वाखा गायब जुयाच्वंगु खँ पत्ता लगे जूगु दु ।

अन जलद्यः गण हइबलय् द्यःपिंत लुँध्वाखा व वहध्वाखां दुकयाः लसकुस यायेमाःगु चलन जुयाच्वन। ३६ दँ न्ह्यः थ्व जलद्यः गण अन हःबलय् सकसितं लुँध्वाखा वहध्वाखां हे दुकाःगु जुयाच्वन। तर अबलय् प्रयोग याःगु उगु लुँध्वाखा वहध्वाखा आः गन वन धकाः माः वंबलय् गनं हे मदुगु खँ सीदत। जलद्यः जात्राया लागिं तयारी यानाच्वंगु ग्वसाः खलकं धाः कथं उगु ध्वाखात गन तयातल जुइ धकाः मालेगु झ्वलय् गुथि संस्थान, कोशी तोषाखाना, पशुपति विकास कोष सकभनं न्यनेकने यायेधुंकूगु दु। तर सुनां नं थःथाय् दु मधाः। थुकिं यानाः थ्व बहुमुल्य ध्वाखा दथुइ हे सुनां गायब याना बिउगु खः लाकि धइगु आशंका जुयाच्वंगु दु ।

हरेक झिंनिदँय् छक्वः जलप्याखं ग्वलय् हयाः हुइके माःगु चलन दु। तर वंगु ३६ दँ न्ह्यवंनिसें थ्व परम्परा न्ह्याये फयाच्वंगु मदु। थुगुसी स्थानीय जनता जानाः जलप्याखं ग्वलय् दुकायेगु तयारी जुयाच्वंगु खः। उकिं ३६ दँ न्ह्यः सुनां गय् यानाः जात्रा सञ्चालन यात व सिधयेधुंकाः सुनां छु यात धकाः धायेफुपिं मनूत नं आः मदयेधुंकल ।

थ्व जलप्याखं कन्हय् ग्वलय् दुहां वइगु जुयाच्वंगु दु। उकिया निंतिं तयारी पूरा जुइधुंकूगु खँ ग्वसाः खलकं धाःगु दु। थ्व तःन्हु तक हे विजेश्वरीया दबुली हुइकीगु चलन दु। प्याखंया लागिं द्यःगंछिंया लागिं वसः, भ्वय्, बलि आदि यायेबलय् लखौं तकाया खर्च जुइगु खँ नं ग्वसाः खलकं धाःगु दु ।