विशेष समितिया सिफारिस कार्यान्वयन जुइ : प्रम
प्रधानमन्त्री माधवकुमार नेपालं सरकार शान्ति सम्झौता कथं सेना समायोजन विशेष समितिं याःगु सिफारिस कार्यान्वन यायेत प्रतिबद्ध दुगु खँ धयादीगु दु । वयेकलं संचार माध्यमय् वःगु बुखँ कथं थःगु धारण मबीत इनाप यानादिसें शान्ति सम्झौताया पालनाय् सरकार पूर्ण प्रतिबद्ध दुगु धयादिल ।
रक्षामन्त्री विद्यादेवी भण्डारीं माओवादी लडाकुयात नेपाली सेनाय् समायोजन यायेमज्यूगु धकाः बियादीगु अभिव्यक्ति, भारतीय सेनाध्यक्ष दीपक कपुरया अभिव्यक्ति व प्रधानमन्त्रीं माओवादी लिट्टे थें जुइगु धकाः प्वंकादीगु अभिव्यक्तिया बारे प्रमुख प्रतिपक्षी दल एनेकपा (माओवादीं) संसदय् ल्ह्वंगु न्ह्यसःया लिसः बियादिसें प्रधानमन्त्री नेपालं माओवादी सेनाया लडाकुया रेखदेख, समायोजन व पुनस्थापनाया निंतिं गठित विशेष समिति संविधान कथं गठन जूगु धयादिसें उगु समितिय सिफारिस सरकारं कार्यान्वयन यायेगु विश्वास प्वंकादिल ।
'सेना समायोजनया विषयलय् सुनां गन छु न्ववात धइगु ल्यूने वनेगु आवश्यक मदु ।' प्रधानमन्त्रीं धयादिल, - 'शान्ति प्रकृया निष्कर्षय् थ्यंकेत सरकार क्रियाशील दुगु विश्वास प्वंकाच्वनाः ।'
अथेहे वयेकलं भारत पाखें नेपाली सेनां ल्वाभः हःगु धइगु माओवादीया द्वपं निराधार जूगु स्पष्ट यानादिसें नियमित प्रकृया कथं सेनाया सवलीकरणया निंतिं ट्रक, एम्बुलेन्स व प्लाष्टिकया ज्वलंत हयाःगु धयादिल ।
माओवादीं नं लिट्टे जुइगु धापूया बारे प्रधानमन्त्री नेपालं थ:म्हं शान्ति प्रकृयायात उपेक्षा यानाः वंसाः संसारया विद्रोहीतय्सं थीथी नियति भागे यायेमाःगु दसु बियागु धयादिसें थःगु धापू दक्वं पक्ष शान्ति प्रकृयाया प्रति इमान्दार जुइमा धइगु पक्षय् केन्द्रीत जूगु धयादिल ।
सेनां भारतं ल्वाभः हःगु भारतीय सेनाध्यक्षया धापू व प्रधानमन्त्रीं माओवादी नं लिट्टे थें जुइ धकाः न्ववानादीगु अभिव्यक्ति प्रति कडा आपत्ति प्वंकूसें माओवादीं थ्वस्वयां न्ह्य:या संसद बैठक बहिष्कार याःगु खः । नापं माओवादीं प्रधानमन्त्री थुकीया बारे संसदय् लिसः बीमाःगु माग याःगु खः ।
अथेहे प्रधानमन्त्रीया लिसः लिपाः माओवादी नेता अग्नि सापकोटां संसदय् न्ववानादिसें प्रधानमन्त्रीं गम्भीर जुयाः लिसः मब्यूगु द्वपं बियादिल । वयेकलं प्रधानमन्त्री भारतीय सेनाध्यक्षया अभिव्यक्ति प्रति संवेदनशील मजूगु धायादिसें असन्तुष्टि प्वंकादीगु खः ।
