शान्ति सम्झौता विपरित अभिव्यक्ति दुःखद : अयोग

राष्ट्रिय मानवअधिकार आयोगं सरकारया वरिष्ठ मन्त्री व प्रतिपक्षी दलया नेतात पाखें अन्तरिम संविधान व बृहत शान्ति सम्झौता विरुद्ध अभिव्यक्ति ब्यूगु धासें दुःख प्वंकूगु दु ।

विहीवाः आयोगं छगू प्रेस वक्तव्य पिथनाः थंज्याःगु अभिव्यक्ति सार्वजनिक जुइगु दुःखद जूगु धासें इलय् हे संविधानया घोषणा यायेगु, माओवादी लडाकूया समायोजन व व्यवस्थापन यायेगु, निजी व सार्वजनिक छेँबुँ कब्जा यायेगु ज्या बन्द यायेगु, दण्डहीनतायात अन्त्य यायेगु, देशय् शान्ति निर्माण व कानुनी व्यवस्थायात सुढृद यायेत सरकार, सत्तापक्ष व प्रतिपक्ष दलतय् मू दायित्व जूगु खँ न्ह्यथंनातःगु दु ।

अथेहे इलय् हे न्हूगु संविधान निर्माणया ज्या पूवंकेत संविधानसभाय् प्रतिनिधित्व याइपिं दक्वं राजनीतिक दलत विशेष यानाः सत्तापक्ष व प्रमुख प्रतिपक्षी दथुइ उच्च समझदारी सहमति व सहकार्यया निंतिं नं अयोगं बः ब्यूगु दु ।

रक्षामन्त्री विद्या देवीभण्डारीं छुं न्हि न्ह्य: विशेष समितिं निर्णय यासाः माओवादी लडाकुयात नेपाली सेनाय् समायोजन यायेत रक्षामन्त्रालय बाध्य मजुइगु व लडाकु समायोजन थःत अमान्य जुइगु अभिव्यक्ति बियादीगु खः । अथेहे उगु प्रतिक्रियाय् माओवादीं नेतातय्सं सेना समायोजन विशेष समितिलय् च्वनेगुया अर्थ मदुगु खँ धाःगु दु ।