संविधानसभाया अन्तिम मस्यौदा नं लःल्हात
कांग्रेस पाखें फरक मत, फोरमं आन्दोलन घोषणा
न्हूगु संविधान निर्माणया निंतिं संविधानसभाया मस्यौदात तयार यायेत गठन याःगु थीथी झिंछगू समिति मध्ये प्रारम्भिक मस्यौदा व अवधारणा लःल्हाये ल्यं दनीगु अन्तिम समिति राज्य पुनःसंरचना व राज्यशक्तिया बाँडफाँड समितिं नं बिहीवा: थःगु प्रतिवेदन व मस्यौदा लःल्हाःगु दु ।
बुधवाः बहनी तिनि समितिया बैठकं मतदान मार्फत अन्तिम रुप ब्यूगु प्रस्तावयात बिहीवाः संविधानसभाया अध्यक्ष सुवासचन्द्र नेम्वाङयात लःल्हाःगु खः । संविधानसभा भवनय् दुगु अध्यक्ष नेम्वाङया ज्याकूथी रज्य पुनःसंरचना व राज्यशक्तिया बाँडफाँड समितिया अध्यक्ष लोकेन्द्र विष्ट उगु प्रतिवेदन लःल्हानादीगु खः ।
प्रतिवेन लःल्हायेगु झ्वलय् समिति अध्यक्ष विष्टं समितिइ सहमतिया आधारय् प्रतिवेदन तयार यायेगु यक्व कुतः जुसां सहमति मजुइवं अन्तिम इलय् मतदान यायेमाःगु धयादिल । अथेहे संविधानसभा अध्यक्ष नेम्वाङं संविधानसभा अर्न्तगत दक्वं समितिया प्रतिवेदन तयार जूगुलिं आः संविधान निर्माण यायेगु ज्या याकनं क्वचाइगु विश्वास प्वंकादिल ।
समितिं उपसमितिं तयार या:गु प्रारम्भिक मस्यौयात परिमार्जन याना: खप्तड, लुम्बिनी-अवध–थारूवान, जडान, कर्णाली, मगरात, तमुवान, नारायणी, ताम्सालिङ, नेवाः, मिथिला–भोजपुरा–कोचिला, सुनकोसी, किराँत, लिम्बुवान, शेर्पा झिंप्यगू प्रदेशया प्रस्ताव बहुमतं पारित या:गु ख: ।
उखे उगु प्रतिवेदन प्रति कांग्रेस व मधेशी जनअधिकार फोरमं असहमति प्वंकूगु दु । कांग्रेस व्यपक सहलह बिनाः समितिं निर्णय याःगु धासें उकी असहमति प्वंकूगु खः । नापं कांग्रेसं राजनीतिक अग्राधिकारया बारे नं असहमति प्वंकूगु दु । थ्वया दथुइ कांग्रेसया नेता गोपालमान श्रेष्ठ व आरजु देउवा ब्यागलं ब्यागलं फरक मत दर्ता याकूगु दु ।
अथेहे फोरमं समितिया प्रतिवेदनं मधेशयात कुचाः याःगु धासें असहमति प्वंकूगु दु । फोरमं थःपिंत उगु प्रस्ताव स्वीकार मजुइगु धासें माघ ९ गते निसें उगु प्रस्ताव विरुद्ध आन्दोलन यायेगु खँ धाःगु दु ।
