उपराष्ट्रपति झायात क्रियाशील यायेत संकल्प प्रस्ताव दर्ता
प्रमुख स्वंगू दलं संविधान संशोधन लिपा उपराष्ट्रपति पदं निष्कृय परमानन्द झायात हे उपराष्ट्रपतिया कथं क्रियाशील यायेत संसदय् संकल्प प्रस्ताव दर्ता याःगु दु ।
सत्तारुढ नेपाली कांग्रेस व नेकपा (एमाले) व प्रमुख प्रतिपक्षी दल एनेकपा (माओवादी)या प्रमुख सचेतकतय्सं बिहीवाः पद निष्कृय उपराष्ट्रपति झायात संविधान संशोधन लिपाः मां भाय् पाखें शपथ काये दइगु व्यवस्था सहित संकल्प प्रस्ताव दर्ता याःगु खः ।
सर्वोच्च अदालतं वंगु साउन ९ गते झां हिन्दी भासं काःगु शपथ असंवैधानिक जूगु धासें न्हय्न्हु दुने खस् नेपाली भासं शपथ मकासाः पद क्रियाशील मजुइगु फौसला न्यंकूगु खः । उगु फैसला लिपाः वंगु खुला न्ह्यः निसें उपराष्ट्रपति पद निष्कृय जुयाच्वंगु दु ।
मधेशवादी दलतय्सं संविधान संशोधन लिपाः नं झाया पद क्रियाशील जुइगु ग्यारेन्टी मजूगु धासें असहमति प्वंकेवं स्वंगू प्रमुख दलं उमित आश्वसत यायेत संकल्प प्रस्ताव दर्ता याकूगु खः । दर्ता याःगु प्रस्तावय् देशय् ल्हाइगु मां भाय् पाखें नं राष्ट्रपति, उपराष्ट्रपति व प्रधानमन्त्रीं सपथ कायेफइगु व्यवस्था लागू जुइ ।
