रक्षामन्त्रीयात कारवाही यायेत माओवादीया माग
सेना समायोजन सम्बन्धी विवादास्पद अभिव्यक्ति बियादीम्ह रक्षामन्त्री विद्यादेवी भण्डारीयात कारवाही यायेत एनेकपा (माओवादीं) प्रधानमन्त्री माधवकुमार नेपाल समक्ष माग याःगु दु ।
माओवादी लडाकु रेखदेख, समायोजन व पुनःस्थापना सम्बन्धी विशेष समितिया बिहीवाः सुथय् च्वंगु बैठकय् माओवादीं प्रधानमन्त्री नाप स्पष्टिकरण फ्वंसें थंज्याःगु माग याःगु खः । बैठप न्ह्यायेवं हे माओवादीया दुजत जनार्दन शर्मा 'प्रभाकर' व वर्षमान पुन 'अनन्तं' रक्षामन्त्रीया अभिव्यक्तिया कडा विरोध प्वंकूगु खः ।
माओवादी नेतातय्सं रक्षामन्त्रीया थंज्याःगु धापू इलय् वयलय् वयाच्वंगुलिं गम्भीर व योजनावद्ध रुपं शान्ति प्रकृया स्यंकेगु षड्यन्त्र जुयाच्वंगु धासें आपत्ति प्वंकूगु खः ।
बैठकय् प्रधानमन्त्री नेपालं रक्षामन्त्रीया धापूया ल्यूने मवनेत माओवादीयात इनाप यानादिल । वयेकलं माओवादीयात आश्वस्त यायेगु कुतः यानादिसें सरकार सेना समायोजन यायेगु ज्याय् प्रतिबद्ध जूगु धासें सरकारया नियतय् शंका मयायेत इनाप यानादिल ।
अथेहे बैठकय् शान्तिमन्त्री रकम चेम्जोङं सरकारं रक्षामन्त्रीया अभिव्यक्ति व्यक्तिगत जूगु धकाः म्हिगया मन्त्रिपरिषद्या बैठकं हे खण्डन यायेधुंकूगु धयादिसें थुकीया बारे तक्यनाः मच्वनेत माओवादीयात इनाप यानादिल ।
बिहीवाःया बैठकय् रक्षामन्त्रीया अभिव्यक्तिइ केन्द्रीत जुइवं मेगू छुं विषयलय् सहलह जुइ मफूगु खः ।
