गोठाटारय् स्थानीयवासीपाखें प्रहरी चौकी घेराउ
येँ (सन्ध्या टाइम्स)/गोठाटारय् म्हिगः जूगु गोली काण्डयात कयाः दोषीयात कारवाही व पीडितयात क्षतिपूर्ति माग यासें थौं सुथंनिसें अन सर्वदलीय रुपं जुलुस पिकयाः प्रहरी चौकी घेराउ याःगु दु। गोलीं कयाः सीम्ह च्यादँया सन्तोष कार्कीया परिवारयात क्षतिपूर्ति बीमाःगु नापं गोली चले याःपिं फुकसित ज्वनाः कारवाही यायेगु निंतिं स्थानीय मनूतय्सं अन सक्रिय दलतय्त इनाप याःगुलिं थौं राजनीतिक दलतय्गु मुँज्या च्वनाः सर्वदलीय रुपं तिनकुने प्रहरी चौकीइ वनाः वार्ता याःगु खः ।
माओवादी, कांग्रेस, एमाले नापं अन क्रियाशिल राजनीतिक दलया स्थानीय नेतातय्गु नेतृत्वय् पिदंगु उगु जुलुस जिल्ला प्रशासन ज्याकुथी नं वनीगु खँ धाःगु दु। दोषीयात कारवाही मयाःतले सकलें छप्पँ जुयाः हे ल्वायेगु नापं माग पूरा मजूतले गोलीं कयाः सीम्ह मचाया अन्तिम संस्कार तकं मयायेगु खँ नं स्थानीय मनूतय्सं धाःगु दु ।
