थनिंनिसें स्थानीय निकाय ठप्प
येँ (सन्ध्या टाइम्स)/स्थानीय निकाय आन्दोलन केन्द्रीय समन्वय समितिया आह्वानय् थनिंनिसें देय्न्यंकंया स्थानीय निकाय ठप्प याना बिउगु दु ।
स्थानीय निकाय ठप्प याना बिउगु कारणं यानाः थनिंनिसें स्थानीय निकायसं ज्या मजुयाः जनतायात समस्या ब्वलंगु दु। अनिश्चिकालीन बन्द याःगुलिं स्वनिगःया येँ महानगरपालिका, यल उपमहानगरपालिका, किपू नगरपालिका, ख्वप नगरपालिका, मध्यपुर थिमि नगरपालिका नापं स्वनिगःया फुक्क गाविसया जनताया ज्या नं ठप्प जूगु दु। अत्यावश्यक सेवा दमकल व एम्बुलेन्स संचालन बाहेक स्थानीय निकायपाखें यानाच्वंगु फोहरमैलाया ज्या तकं थनिंनिसें स्थानीय निकायया कर्मचारीतय्सं बन्द याना बिउगु दु ।
ट्रेड युनियनया अधिकार दयेमाःगु, स्थानीय निकायया कर्मचारीतय्त स्थायी यायेमाःगु नापं थीथी कथंया माग यानाः न्यागू कर्मचारी संगठनया मंकाः मोर्चापाखें थःपिनि निर्णायक आन्दोलन धकाः थनिनिसें थ्व बन्द याःगु दु। सरकारं उमिगु माग पूरा याये धकाः नं मयाःगु खः ।
