१४ प्रदेश पारित
येँ (सन्ध्या टाइम्स)/संविधानसभाया राज्य पुनर्संरचना समितिं म्हिगः मतदानया लिधंसाय् १४ प्रदेश दुगु नक्सायात पारित याःगु दु। ४२ म्ह दुजः मध्ये २३ मत हयाः उगु प्रस्ताव पारित जूगु खः। आः समितिपाखें थौं हे १४ प्रदेश दुगु नक्सायात संवैधानिक समितिइ लःल्हाइगु ग्वसाः दु। उकी सत्तारुढ पार्टी एमाले व विपक्षी माओवादीया मत १४ प्रदेशया पक्षय् छगू हे थासय् लाःगु खः। नेपाली कांग्रेस व मधेशवादीतय्सं धाःसा खुगू प्रदेशया नक्शाय् मत बिल ।
उखे आदिवासी जनजातियात अग्राधिकार बीगु मत नं पारित जूगु दु। अग्राधिकार बी वा मबीगु धइगु विषयय् मतदान जूबलय् समितिया दुजः प्रतिभा राणा बैठकय् मच्वँसे पिहां वना बिउगु कारणं अग्राधिकार बी मजिउ धाइपिं छगू मत कम जुयाः बूगु खः ।
