बजाः भाः १७ प्रतिशत थहां वन
येँ (सन्ध्या टाइम्स)/थुगु आर्थिक दँया वंगु न्यालाया दुने नसा ज्वलंया लिसें त्वँसा ज्वलनय् नं १७ दशमलव ८ प्रतिशतं भाः थहां वंगु खँ नेपाल राष्ट्र बैंकं जानकारी बिउगु दु।
लिसें समग्र उपभोक्ताया मुद्रास्फीति वंगु आर्थिक दँय् स्वयां म्हो जूगु नं कारण न्ह्यथँसे राष्ट्र बैंकं अखाद्य व सेवा समुहया भाःया सुचकांकय् ३ दशमलव ७ प्रतिशत जक थहां वंगुलिं थ्व ल्याः पिहां वःगु जानकारी बिउगु दु ।
राष्ट्र बैंक बिउगु जानकारी कथं चिनी व चिनीजन्य पदार्थय् ११ प्रतिशतं थहां वनाः ५६ दशमलव ९ प्रतिशत तक थ्यंगु दु। राष्ट्र बैंकं याःगु समिक्षा कथं थ्व ई तकया दुने तरकारीइ व सिसाबुसाय् ३९ दशमलव ९, केँ व मसला लगायतया ज्वलनय् ३४ दशमलव ६ न्या व लाय् २८ दशमलव ४ व ख्येँचय् २१ दशमलव ९ प्रतिशत तक भाः थहां वंगु जानकारी बिउगु दु ।
अथे हे सूर्ति व थ्व लिसे सम्बन्धि ज्वलंया भाः ११ दशमलव ६ प्रतिशतं तक थहां वंगु दुसा उखे संचार व यातायातपाखे धाःसाः ७ दशमलव ८ प्रतिशतं भाः कुहां वःगु नं बैंकं न्ह्यथंगु दु ।
