संविधानय् झिंप्यंगू प्रदेशया प्रस्ताव
राज्यया पुनःसंरचना व राज्यशक्तिया बाँडफाँड समितिं न्हूगु संविधनय् झिंप्यंगू प्रदेशया प्रस्ताव याइगु जूगु दु ।
राज्यया पुनःसंरचना बारे प्रारम्भिक मस्यौदा तयार यायेत गठन जूगु उप समितिं तयार याःगु झिंप्यंगू व खुगू प्रदेश दुगु प्रस्तावय् बुधवाः जूगु मतदानय् झिंप्यंगू प्रदेशयात परिमार्जन सहित प्रारम्भिक मस्यौदाय् समावेश यायेत बहुमतं पारित याःगु खः ।
समितिया बुधवाःया बैठकय् जूगु मतदानय् झिंप्यगू प्रदेश समावेश नक्सा यंकेगु प्रस्तावया पक्षय् नीप्यंगू व निगूलिं नक्सा यंकेगु पक्षय् झिंन्यागू मत लाःगु खः । एमाले व माओवादीया सभासदत झिप्यंगू प्रदेश दुगु नक्सा यंकेगु पक्षय् च्वनाः मतदान याःगु खःसा कांग्रेस व मधेशवादी दलतय्सं निगूलिं नक्सा यंकेगु पक्षय् मतदान याःगु खः । एमाले सभासद् शंकर पोखरेलं धाःसाः मतदान प्रकृयाय् असहमति प्वंकूसें मतदानय् ब्वति कयामदी ।
अथेहे समितिं जातीय भाषिक आधारय् ल्यूने ला:गु जाति समुदाययात प्रदेश अन्तर्गत सिर्जना जुइगु विशेष संरचनाय् निगू निर्वाचन अवधि तक उमिगु हे नेतृत्व स्थापित जुइ कथं राजनीतिक अग्राधिकार बीगू प्रस्ताव नं बहुमतं पारित जूगु दु ।
उपसमितिं खप्तड, कर्णाली, थरुहट, मगरात, पश्चिम मधेश, तमुवान, नारायणी, ताम्सालिङ, नेवा:, सुनकोशी, मधेश, किरात, विराट व लिम्बुवान सहित झिंप्यंगू प्रदेशया प्रस्ताव पेश या:गु ख: ।
तर उपसमितिं प्रस्ताव या:गु प्रस्तावयात परिमार्जन याना: दक्षिणया निगू प्रदेश चीका: उत्तरय् निगू प्रदेशया तयेगु प्रस्ताव समितिं स्वीकृत या:गु दु । उपसमितिं प्रस्ताव या:गु खप्तड व कर्णालीया छुंछुं भाग दुथ्याका: 'जडान प्रदेश' व सुनकोसी व किराँतया च्वयेया भागयात 'शेर्पा प्रदेश' थप याना: समितिं नक्सा परिमार्जन या:गु दु ।
अथेहे उपसमितिं बैकल्पिक प्रस्ताव कथं पूर्वी पहाडय् सृजंगा, तराईलय् सिम्रौनगढ वा जनकपुर, केन्द्रय् सगरमाथा, पश्चिमय् गण्डकी व सुदुर पश्चिमय् कर्णाली, पश्चिम तराईलय् लुम्बिनी (भावर) प्रदेश कथं खुगू प्रदेशया प्रस्ताव या:गु ख: ।
समितिं बिहीवाः संविधानसभाया अध्यक्ष सुवासचन्द्र नेम्वाङयात प्रारम्भिक मस्यौदा व अवधारणा लःल्हाइगु ज्याझ्वः दु ।
