रक्षामन्त्रीया धापू व्यक्तिगत : सरकार
सरकारं रक्षामन्त्री विद्यादेवी भण्डारीं सेना समायोजन यायेमज्यू धकाः प्वंकादीगु अभिव्यक्ति व्यक्तिगत खँ धाःगु दु ।
बुधवाः च्वंगु मन्त्रिपरिषद्या बैठक लिपाः सरकारया प्रवक्ता व सूचना व संचार मन्त्री शंकार पोखरेलं रक्षामन्त्री भण्डारीया सेना समायोजन सम्बन्धी अभिव्यक्तिया खण्डन यानादीगु दु । वयेकलं सरकार शान्ति सम्झौता प्रति प्रतिबद्ध जूगु धयादिसें सेना समायोजन सम्बन्धी विशेष समितिं याःगु निर्णय कार्यान्वयन यायेत सरकार प्रतिबद्ध जूगु कनादिल ।
रक्षामन्त्री भण्डारीं मंगलवा छगू पत्रकार सम्मेलनया ग्वसा:ग्व:या माओवादी लडाकूयात नेपाली सेनाय् समायोजन यायेमज्यूगु धयादिसें अज्याःगु निर्णय सेना समायोजन विशेष समितिं याःसा थःत मान्य मजुइगु खँ धयादीगु खः ।
अथेहे बुधवाःया मन्त्रिपरिषद्या बैठकं सहायक रथी पवनजंग थापायात नेपाली सेनाया रथीलय् बढुवा याःगु दुसाः उपरथीत गौरवशमशेर राणा व अनिलजंग थापाया म्याद निदँया निंतिं थप याःगु दु । अथेहे बैठकं जनकपुर जयनगर रेल्वे कम्पनीया महाप्रबन्धकय् भोला पन्जियारयात नियुक्त याःगु दु ।
