इलय् संविधान निर्माण मजुइगु कल्पना मयाये : मुन
दक्षिण व मध्य एसिया मामिला सम्बन्धी अमेरिकी उपसहायक विदेशमन्त्री प्याट्रिक मुनं इलय् हे न्हूगु संविधान निर्माण मजुइगु आः हे बिचाः यायेमफइगु खँ धयादीगु दु । नापं वयेकलं नेपालय् इलय् हे न्हूगु संविधान निर्माण जुइगु विश्वास नं प्वंकादिल ।
प्यन्हून्यंकया नेपाः भ्रमण क्वचायेकाः अमेरिका लिहांझाये न्ह्यः वयेकलं नेपालय् न्हूगु संविधान व शान्तिया दिगो व्यवस्थापनया विकल्प मदुगु धयादिसें इलय् हे संविधान निर्माण मजुइगु धइगु काल्पनिक अवस्थाया बारे बिचाः मयायेत इनाप यानादिल ।
वयेकलं राजनीतिक दलत दथुइ समझदारी आवश्यक जूगु धयादिसें शान्ति प्रकृयायात तार्किक निष्कर्षय् थ्यंकेत समझदारीया आधारय् न्ह्याः वनेत राजनीतिक दलतय्त इनाप यानादिल । वयेकलं नेपाः भ्रमणया झ्वलय् सरकारी अधिकारीत नापं राजनीतिक दलया नेतात दक्वं शान्ति प्रकृया प्रति इमान्दार खनाःगु धयादिसें दक्वं समझदारी यानाः न्ह्याः वनेमाः धयादिल ।
अथेहे वयेकलं माओवादी अध्यक्ष पुष्पकमल दाहाल 'प्रचण्ड' नापया खँल्हाबंलाय् उमित आतंककारीया सूचीं चीकेगु बारे सहलह जूगु धयादिसें आतंककारी सुचीं चीकेगु कुतः सकारात्मक रुपं न्ह्यानाच्वंगु कनादिल ।
अमेरिका लिहांझाये न्ह्यः मुनं बुधवाः सुथय् नेपाली कांग्रेसया सभापति गिरिजाप्रसाद कोइरालायात नापलाना खँल्हाबंला यानादीगु खः । उगु इलय् वयेकलं उच्चस्तरीय राजनीतिक संयन्त्रप्रति अमेरिकाया पूर्ण समर्थन दुगु धयादिसें नेपाःया शान्ति प्रकृया, संविधान निमार्ण व सेना समायोजन बारे च्यूताः प्वंकादीगु खः ।
