'नेपा:या मन्त्रीत पाखें भारतीय सेनाध्यक्षया भाय् न्ववाय् शुरु'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' नेपाःया मन्त्रीत पाखें भारतीय सेनाध्यक्ष दीपक कपुरया भाय् न्वावये शुरु याःगु खँ धयादीगु दु । रक्षामन्त्री विद्यादेवी भण्डारी प्रति लक्षित यानादिसें वयेकलं शान्ति प्रकृया विरुद्ध भारतीय सेना प्रमुख कपुरं न्ववानाच्वंगु भाय् विदेशी दलाल जूपिं नेपाः मन्त्रीतय् न्ववाये शुरु जूगु द्वपं बियादिल ।
वरिष्ठ पत्रकार नापं साहित्यकार शक्ति लम्सालया अभिनन्दनय् येँ बुधवाः याःगु ज्याझ्वलय् न्ववानादिसें माओवादी अध्यक्ष प्रचण्डं माओवादीं राष्ट्रिय स्वाधीनता व नागरिक सर्वोच्चताया निंतिं आन्दोलन यागुलिं विदेशी शक्तिया न्ह्यने क्वःमछुइगु धयादिल । वयेकलं थुगु आन्दोलन सत्ता प्राप्तिया निंतिं मजूगु स्पष्ट यानादिसें थ्व युगया आवश्वकता जूगु धायदिल ।
वयेकलं राष्ट्रिय स्वधीनताया अन्दोलनया झ्वलय् माओवादीं भारत नाप जूगु असमान सन्धीत खारेज जुइमाःगु माग यनाःगुया अर्थ भारत नाप युद्ध यायेत स्वाःगु मखु धयादिल । वयेकलं पुलांगु असमान सन्धीत खारेज यानाः न्हूगु आधारय् न्हूगु सन्धी जुइमाः धयादिल । दक्व सन्धीत अंग्रेज शासकया पालय् जूगुलिं आः न्हूगु सन्धी यायेत भारत सरकार नं तयार जुइमाःगु खँ वयेकलं बः बियादिल ।
