येँ गोली चलेजुल, छम्ह सित

येँया काँडाघारीइ छेँ दनेत सतकय् तयातःगु गिट्टीया बिषयसं ब्वलंगु कचवंया दथुइ गोली चलेजुइवं छम्ह मचा सीगु दु । गोली लानाः हःताकःमि नापं प्यम्ह घाःपाः जूगु दु । हःताकःमिं न्ह्यःनेलाथे गाली कयेकेवं दोलखा शैलुंगेश्वरया गुदँ दुम्ह सन्तोष कार्की सीगु खः । वय्कः स्थानीय भीमेश्वर एकेडेमी निगू तगिमय् ब्वनाच्वनादीम्ह ब्वनामि खः । गोली लानाः स्थानिय राजाराम थापा व शोभा कार्की घाःपाः जूगु दु । इमिगु यलया सातदोबाटोय् च्वंगु बी एन्ड बी अस्पतालय् वासः जुयाच्वंगु दु । घाःपाः जूम्ह थापाया निपा तुतिइ व कार्कीया जव ल्हातय् गोली लाःगु दु । स्थानीय पाल्देन लामां छेँ दयेकेत सतकय् तयातःगु गिट्टीं वयेवनेगुलिइ पंगः जूगु धासें स्थानीय मनूतय्सं कुँ खिनेवं कचवं ब्वलंगु खः । स्थानीय मनूतय्गु कुँखिना लिपा प्रहरीया रोहबरय् गिट्टी चीकेगु सहमति जूगु खः । तर प्रहरी लिहाँवंगु बाघौ लिपा गोली लचेजूगु खः। पाल्देन लामाया काय्पिन्सं काभ्रें ल्वाभः नापंयािपं मनूतय्त सःता गोली कयेकेब्यूगु धाःगु दु । महानगरीय प्रहरी बृत्त कोटेश्वरया प्रहरी सहायक निरीक्षक कमल खड्कां कचवं मिलेयाना लिहाँवयागु छुं ई लिपा थुकथं घटना जूगु धयादिल । गोलीं कयेकेवं तँम्वयेकूपिं स्थानिय मनूतय्सं गोली कयेकूम्ह काभ्रेया स्वीनिदँ दुम्ह पासाङ लामा व ख्वप चित्तपोल वडा नम्बर-४ या नीन्हय्दँ दुम्ह रामेश्वर श्रेष्ठयात दायाः प्रहरीया जिम्मा ब्यूगु दु । दाःगु हुनिं घाःपाः जूपिं इमित काठमाडौं मेडिकल कलेज सिनामंगलय् वासः याकूगु दु । ईपं निम्हेसिया नं छ्यने घाः जूगु अस्पतालं धाःगु दु । स्वंगः मोटरसाइकलय् वःपिं खुम्हेसिनं न्ह्यःनेलाःथे गोली चलेयाःगु स्थानीय मनूतय्सं धाःगु दु । घटना लिपा स्थानीय मनूतय्सं गोली चलेयाःपिन्सं गयावःगु निगः मोटरसाइकल च्याकाब्यूगु दुसा छगः मोटरसाइकलय् हःताकःमि च्वना बिस्युवंगु दु । घटनास्थलय् प्रहरीं छगू चाइनीज पेस्तोल लुइकूगु दु ।