रक्षामन्त्रीया अभिव्यक्तिलय् गृहयुद्धया षड्यन्त्र : माओवादी
एकीकृत नेकपा (माओवादीं) लडाकु समायोजन बारे रक्षामन्त्री विद्या भण्डारीं बियादीगु लिप्पांगु अभिव्यक्ति शान्ति प्रकृयायात भंग यानाः देय्यात गृहयुद्धय् घ्वानाछ्वयेगु षड्यन्त्र जूगु दाबी याःगु दु ।
बुधवाः माओवादीं छगू प्रेस वक्तव्य पिथनाः शान्ति प्रकृयाया छगू प्रमुख ज्या सेना समायोन यायेगु प्रति रक्षामन्त्रीं प्वंकादीगु अभिव्यक्ति पाखें देय्यात हानं गृहयुद्ध पाखे यंकेगु कुतः जुयाच्वंगु खँ धाःगु दु । माओवादीं रक्षामन्त्रीया धापू प्रति थःपिनिगु कडा आपत्ति दुगु धासें शान्ति प्रकृयाप्रति सरकारया प्रतिबद्धताय् हे शंका ब्वलंगु खँ नं धाःगु दु ।
अथेहे वत्तव्यय् थंज्याःगु षड्यन्त्र विरुद्ध दक्वं छप्पँ जुइत सम्बन्धित सकसितं इनाप यानातःगु दु ।
रक्षामन्त्री भण्डारीं मंगलवाः पत्रकार सम्मेलन यानाः सेना समायोजन विषेश समितिलय् रक्षा मन्त्रालय व नेपाली सेनायात दुमाथ्याकूगुलिं समितिया निर्णय कथं ज्या यायेत रक्षा मन्त्रालय वाध्य मजुइगु खँ धयादीगु खः । नापं वयेकलं माओवादीया लडाकुतय्त सेना समायोजन यायेमज्यूगु खँ नं धयादीगु खः ।
