थौं श्रीपञ्चमि - सरस्वतीया पुजा याना हनाच्वन

थौं श्रीपाचमी पर्व विद्याया आराध्य देवी सरस्वतीया पूजा-आराधना याना हनाच्वंगु दु । विद्याया देवी सरस्वती सिर्जनाया देवी जूगुलिं विशेषयानाः साहित्यकार कलाकार पत्रकार शिक्षक व ब्वनामितय्सं थःथःगु कला-साधनाया ज्वलं च्वसा सपुू वाद्ययन्त्र नापं मेमेगु ज्वलंयात सरस्वतीया रुपय् पूजा यानाच्वंगु दु । तान्त्रिकतय्सं तन्त्रसिद्धिया निंतिं तारादेवीया रुपय् आराधना याइ । सूर्य उत्तरपाखे वनाः न्हि ताःहाकः जुइगु व वसन्त ऋतु सुरु जुइगु विश्वासया नापं थौंया दिंयात 'वसन्त पञ्चमी' नं धायेगु याइ । ऋग्वेदय् वाग्देवीया नामय् ल्वकंह्वाःम्ह ब्रम्हाया अर्धाङ्गिनी ब्रम्हायणीया पुजा उपासनां ज्ञान सिद्धि व सद्बुद्धि प्राप्त जुइगु जूगुलिं सरस्वती पूजाया तःधंगु महत्व दु । थौं सरस्वतीया पूजा याना विद्यारम्भ यातधाःसा सर्वसिद्धि प्राप्त जुइगु बिश्वास दु । थौं इहिपा कय्तापुजा बार् हापिकायेगु व इहि यायेगु नापंया सामाजिक व धार्मिक ज्या यायेत साइत स्वयेम्वाः धायेगु याइ । थौं मस्तय्त शिक्षा सुरु यायेगु व न्हाय् न्हाय्पं प्वाः खंकेगु याइ । येँया स्वयम्भू मेति व गैह्रीधाराया नीलसरस्वती यलया लेले सरस्वती कुण्डय् तःधंगु मेला जूगु दुसा थीथी जिल्लाय् दुगु सरस्वतीया देगलय् थौं सुथंनिसें पुजाआजा यायेत मनूतय्गु भीड हे जूगु दु । सरस्वतीयात छानातःगु न्हय्गः वा स्वगः जाकि वाँ मथिक घुटुके फतधाःसा विद्या व बुद्धि अप्वइगु व चेतनाया ज्यति दइगु बिश्वास यानातःगु दु ।

थ्वहे दथुइ वसन्तपाचमीया दिं थौं राष्ट्रपति डाक्टर रामवरण यादवं येँया हनुमानध्वाखा लाय्कुलिइ वसन्तश्रवण यानादीगु दु । हनुमानध्वाखाया नासःचुकय् वसन्तश्रवण लिपा राष्ट्रपति यादवं सिन्ह स्वां कयादीगु खः । बसन्त श्रवणया निंतिं प्रधानमन्त्री, सभामुख, प्रधानसेनापति नापंयापिं नासःचुकय् थ्यंकादीगु खः । ज्याझ्वलय् नेपाली सेनां वय्कःया सम्मानय् सलामी ब्यूगु खः ।