कपुरं प्रधानसेनापति गुरुङ नापलात

नेपाःया भ्रमणय् दीम्ह भारतीय सेनाध्यक्ष दीपक कपुरं थः समकक्षी नेपाःया प्रधानसेनापति छत्रमान गुरुङयात नापलाना खँल्हाबंला यानादीगु दु ।

मंगलवाः सनिलय् नेपाली सेनाया जंगी अड्डाय् जूगु खँल्हाबंलाय् विविध समसामयिक विषयलय् सहलह जूगु खः । सैनिक जनसम्पर्क निर्देशनालयं वयेकपिं नालपायेधुंकाः छगू वक्तव्य पिथंसें निम्ह सेना प्रमुख दथुइ समसामयिक विषयलय् सहलह जूगु खँ न्ह्यथंगु दु ।

भारतीय सैनिक प्रमुख कपुर मंगलवाः न्हिनय् झिंनिताः इलय् भारतीय एर फार्सया विशेष विमानं येँ थ्यंकादीगु खः । वयेक खुम्ह दुजः दुगु पुचःया नेतृत्व यासें नेपाःया प्यन्हून्यंकया भ्रमणय् झायादीगु खः ।

मंगलवाः प्रधानसेनापति गुरुङयात नापलये न्ह्यः वयेकलं सैनिक मञ्चय् च्वंगु वीर स्मारकय् स्वा:माः क्वखायेकाःदीगु खः ।