'माओवादी लडाकु नेपाली सेनाय् समायोजन यायेमज्यू'
रक्षामन्त्री विद्या भण्डारीं विस्तृत शान्ति सम्झौताय् एनेकपा (माओवादी) लडाकुयात नेपाली सेनाय् समायोजन यायेगु खँ न्ह्यथंनामतःगु धयादिसें लडाकुतय्त सेनाय् समायोजन याःसा थःत अमान्य जुइगु खँ धयादीगु दु । तर वयेकलं सामान्य नागरिक सरह मापदण्ड पूवंकूसाः माओवादी लडाकुयात नेपाली सेनाय भर्ति यायेफइगु धयादिल ।
मंगलवाः थःगु हे कार्यकक्षय् पत्रकार सम्मेलन यानादिसें मन्त्री भण्डारीं माओवादी लडाकुयात नेपाली सेनाय् समायोजन यायेत सेना समायोजन विशेष समितिं निर्णय यायेवं उगु निर्णय कार्यान्वयन यायेत रक्षामन्त्रालय बाध्य मजुइगु धयादिल ।
वयेकलं सेना विशेष समितिलय् रक्षा मन्त्रालय व नेपाली सेनाया प्रतिनिधित्व मदुगुलिइ असन्तुष्टि प्वंकादिसें प्रधानमन्त्रीं निर्णय यायेवं दक्वं खँ लागू जुइमफइगु धयादिल । वयेकलं प्रधानमनत्रीं नं सम्बन्धित अंगया राय कायेमाःगु धयादिल ।
अथेहे वयेकलं आवश्यक्ता कथं सेनाया निंतिं घातक व गैरघातक निगूलिं कथंया ल्वाभःया बन्दोवस्त यायेगु धयादिसें आः गैरघातक ल्वाभः वसां आवश्यक्ता कथं घातक ल्वाभः नं ह्येगु धयादिल । वयेकलं नेपाली सेनाय् दरबन्दी कथं भर्ना कायेगु अडान हानं तयादिल । नापं वयेकलं दरबन्दी स्वयां छम्ह नं अप्वः भर्ना मयायेगु दाबी यानादिल ।
