आतंकाकारी सूचीं चीकेत माओवादीया इनाप
एकीकृत नेकपा (माओवादीं) आतंककारी सूचीं चीकेत अमेरिका नाप इनाप याःगु दु । माओवादी शान्ति प्रकृयाय् वयेधुंकूसां अमेरिकां माओवादीयात आतंककारी सूचीं मचीकूगु धासें उगु सूचीं याकनं चीकेत इनाप याःगु खः ।
नेपाः भ्रमणय् दीम्ह दक्षिण व मध्य एसियाली मामिला सम्बन्धी अमेरिकी उपसहायक विदेशमन्त्री प्याट्रिक मुन व माओवादी अध्यक्ष पुष्पकमल दाहाल 'प्रचण्ड' दथुइ मंगलवाः जूगु खँल्हाबंलाय् प्रचण्डं माओवादीयात आतंककारी सूचीं चीकेत इनाप यानादीगु खः ।
मंगलवाः सुथय् प्रचण्ड निवास न्हू बजारय् जूगु खँल्हाबंलाय् माओवादीं याःगु प्रस्तावया बारे लिसः बियादिसें उपसहायक मन्त्री मुनं नेपाः स्थित अमेरिकी दूतावसं ब्यूगु रिपोर्टया आधारय् माओवादीया प्रस्तावया बारे निर्णय काइगु धयादिल ।
अथेहे खँल्हाबंलाय् सेना समायोजन, शान्ति प्रकृया, संविधान निर्माण, माओवादी आन्दोलन लगायतया बारे नं सहलह जूगु खः । खँल्हाबंला लिपाः मुनं शान्ति प्रकृया व संविधान निर्माणया निष्कर्षय् थ्यंकेत दलत दथुइ सहमित व सहकार्य आवश्यक जूगु धयादिल । वयेकलं नेपाःया शान्ति प्रकृया सकारात्मक ढगं न्ह्यवनाच्वंगु टिप्पणी नं यानादिल ।
