संयन्त्रं कार्यविधि मस्यौदा तयार यायेत कार्यदल गठन
स्वंगू प्रमुख राजनीतिक दल दुथ्याःगु उच्चस्तरीय राजनीतिक संयन्त्रया बैठक मंगलवाः न्हापांगु पटक च्वंगु दु । उगु बैठकं कार्यविधिया मस्यौदा दयेकेत छगु कार्यदल नं गठन याःगु दु ।
खुम्ह दुजः दुगु कार्यदलय् स्वंगूलिं प्रमुख दलया निम्ह-निम्ह दुजः दुथ्याकूगु दु । उगु कार्यदलय् एनेकपा (माओवादी) पाखें उपाध्यक्ष नारायणकाजी श्रेष्ठ 'प्रकाश' व नेता देव गुरुङ, कांग्रेसया पाखें नेतात अर्जुननरिसंह केसी व कृष्णाप्रसाद सिटौला व नेकपा (एमाले) पाखें नेतात भरतमोहन अधिकारी व युवराज ज्ञवाली दु ।
कार्यदलयात मस्यौदा तयार यानाः पेश यायेगु निंतिं ८ गते तकया समायवधि ब्यूगु दु । वइगु ८ गते संयन्त्रया बैठक च्वनीगु व उगु हे बैठकय् कार्यदलं मस्यौदा पेश याइगु ज्याझ्व: दु ।
कांग्रेस सभापति गिरिजाप्रसाद कोइराला निवास महाराजगंजय् जूगु बैठकय् नेपाली कांग्रेसया पाखें सभापति कोइराला, डा. रामशरण महत, कृष्णा सिटौला माओवादीया पाखें अध्यक्ष पुष्पकमल दाहाल 'प्रचण्ड' उपध्यक्षत डा. बाबुराम भट्टराई व प्रकाश अथेहे एमाले पाखें अध्यक्ष झलनाथ खनाल व भरतमोहन अधिकारीया उपस्थिति दुगु खः । प्रधानमन्त्री नेपाल नं बैठकय् उपस्थित जुयादीसां वयेक छुं इ लिपाः हे लिहांझायादीगु खः ।
बैठकय् कांग्रेस सभापति कोइरालां माओवादीयात माघ १० गते निसेंया आमहड्तालया ज्याझ्वः लित कायेत इनाप यानादिल । माओवादी अध्यक्ष प्रचण्डं धाःसा संयन्त्रया मेगू बैठक लिपाः जक उकीया बारे बिचाः यायेफइगु खँ धयादीगु खः ।
