भारतीय सेना प्रमुख कपुर नेपा: थ्यंकल

भारतीय सेना प्रमुख दीपक कपुर प्यन्हुन्यंकया औपचारिक भ्रमणया निंतिं मंगलवाः येँ थ्यंकादीगु दु ।

इन्डियएन एअर फोर्सया विशेष विमान पाखें मंगलवाः न्हिनय् झिंनिताः इलय् वयेक त्रिभुवन विमानस्थलय् थ्यंकादीगु खः । उगु इलय् वयेकयात लसकुस यायेत नेपाली सेनाया बलाधिकृत रथी तोरणजंगबहादुर सिंह विमानस्थल झायादीगु खः ।

लछि न्ह्यः वयेकलं नेपाःया सेनापति छत्रमान गुरुङनापया खँल्हाबंलाया झ्वलय् माओवादी लडाकुयात नेपाली सेनाय् समायोजन याये मज्यू धकाः अभिव्यक्ति वियादीलिं माओवादीं वयेकया धापूया विरोध यानावयाच्वंगु दु । मंगलवाः नं वयेक विमानस्थलं पिने वनेगु इलय् माओवादी कार्यकर्तातय्सं हाकूगु ध्वाँय् क्यंगु खः । लिपाः प्रहरीं हाकूगु ध्वाँय् क्यनीपिं प्रदर्शनकारीतय्त ज्वना यंकूगु खः ।