नेवाः प्रदेश नेवाःतय् लागिं प्रतिकुल
येँ (सन्ध्या टाइम्स)/संविधानसभाया राज्य पुनर्संरचना समितिं आः नकतिनि पेश याःगु नेपाःया संघीय स्वरुप दुने प्रस्तावित नेवाः राज्य नेवाःतय् लागिं उपयुक्त मजूगु बिचाः बुद्धिजीवीतय्सं प्वंकूगु दु ।
राज्य पुनर्संरचना समितिपाखें आः नकतिनि पेश याःगु संघीय नेपाःया नक्शाय् नेवाः प्रदेशयात तसकं चीकू जक भूमि छुटे यानातःगु दु। नेवाः प्रदेशया लागिं छुटे याःगु भूमि नेपाःया कुल भूमिया ०.२ प्रतिशत जक खः। जब कि नेपाःया कुल जनसंख्याय् नेवाःया ल्याः ५.४८ प्रतिशत (सन् २००१ या जनगणना कथं १२ लाख ४५ हजार २३२) दु। अले नेवाःत स्वयां छुं भचा जक अप्वः दुपिं तामाङ्गतय् लागिं धाःसा २० प्रतिशत भूमि छुटे यानातःगु दु। नेपाःया कुल जनसंख्याया ५.६४ प्रतिशत (सन् २००१ या जनगणना कथं १२ लाख ८२ हजार ३०४) दु। नेवाः स्वयां तामाङ्गया ल्याः ३७,०७२ म्ह जक अप्वः दु। तर भूमि वितरण धाःसा नेवाःयात स्वयां तामाङ्गया १९ गुणा स्वयां अप्वः दु ।
उकिसनं थौंकन्हय् नेवाः प्रदेशया जनघनत्व मेथाय् स्वयां तसकं अप्वः दु। कन्हय् वयाः जनसंख्या ला अझ बढे जुइफु तर भूमि धाःसा बढे जुइ मखु। थुकिं यानाः नेवाःतय्सं थ्व सीमित भूमि दुने मेगु विकास यायेगु सम्भावना म्हो जुया बी। अज्याःगु अवस्थाय् नेवाःतय्सं थःगु भूमिइ च्वनाच्वंपिं मेगु जातिया मनूतय्त बाध्य जुयाः नं पितिना छ्वयेमाःगु अवस्था जुया बी ।
उखे तामाङ्गतय् नं भूमि ला तसकं यक्व दु तर उकिया अनुपातय् जनसंख्या धाःसा म्हो जक दु। थुकिं यानाः थःगु भूमिइ माक्व विकास यायेत उमिके आवश्यक जनशक्ति हे गाइ मखु ।
उकिं आः तयार याःगु राज्यया स्वरुपं न नेवाः प्रदेशया विकास जुइ फइ न तामाङ्ग प्रदेशया विकास जुइ फइ ।
नेवाः प्राविधिकतय्सं थ्व बारे दुग्यंक चिउताः प्वंकूगु दुसा नेपाः राष्ट्रिय पार्टीं उकी थःपिनि सरोकार क्यंगु दु। पार्टीं भूमि वितरणया थ्व ज्या पाय्छि मजू धकाः थःपिनि फरक बिचाः तयेगु खँ धाःगु दु ।
