थनिंनिसें देय्न्यंकं माओवादीया विरोध सभा
येँ (सन्ध्या टाइम्स)/राष्ट्रिय स्वाधिनता व नागरिक सर्वोच्चताया निंतिं धकाः अभियान न्ह्याकेगु झ्वलय् एनेकपा (माओवादीं) न्ह्याका वयाच्वंगु आन्दोलनया झ्वलय् थनिंनिसें देय्न्यंकं खुगू थासय् ततःधंक विरोध सभा याइगु जूगु दु ।
विशेष यानाः भारतं नेपाःयात याना वयाच्वंगु थीथी कथंया हस्तक्षेप नाप नापं नागरिक सर्वोच्चताया सवालयात कयाः प्रदर्शन यायेगु व भाषण बीगु निंतिं अथे माओवादीं सभा यायेत्यंगु खः। माओवादीया घोषित ज्याझ्वः कथं थौं कोचिला-मिथिला लागाय् छगू विरोध सभा याइगु जूगु दु। पार्टीया वरिष्ठ नेतातय्सं न्ववानादीगु उगु विरोधसभाया ज्याझ्वः कथं कन्हय् लिम्बुवान-किराँत-शेर्पा लागाय् सभा यायेत्यंगु दु। माघ ७ गते भोजपुरा-नारायणी-अवध लागा, वकुन्हु हे थारुवान-सेती महाकाली-भेरी कर्णाली-भोटेलामा लागा नापं तमुवान-मगरात लागा व १० गते नेवाः-ताम्सालिङ राज्यय् सभा याइगु ग्वसाः दु ।
