बौद्ध विद्वान रत्नसुन्दर शाक्ययात हना
ख्वप (सन्ध्या टाइम्स)/भक्तपुर बौद्ध सम्पदा संघया न्याक्वःगु अधिवेशन व प्यक्वःगु तःमुँज्याया उलेज्या समारोहय् ख्वपया बौद्ध विद्वान भाजु रत्नसुन्दर शाक्ययात हनेगु ज्या नं जुल ।
भक्तपुर बौद्ध सम्पदा संघया नायः पद्मसुन्दर शाक्यं थः मांया लुमन्तिइ नीस्वनादीगु झिद्वः तका दां व हना पौ लःल्हासें वय्कःयात हनेज्या यानादीगु खः। तःमुँज्याया उलेज्या लुम्बिनी विश्वविद्यालयया उपकूलपति प्रा. डा. शंकर थापां यानादीगु खः। ज्याझ्वलय् मूपाहां प्रा. डा. थापा नापं संस्थाया सल्लाहकार प्रा. सिद्धिरत्न शाक्य, सम्मानित ब्यक्तित्व रत्नसुन्दर शाक्य, भक्तपुर बौद्ध सम्पदा संघया सचिव महेन्द्ररत्न शाक्य व संस्थाया अध्यक्ष पद्मसुन्दर शाक्यपिंसं न्ववानादीगु खः। तःमुँज्यां स्वदँया लागिं न्हूगु ज्यासना पुचः नं ल्यःगु दु ।
