नेप्से क्वय् कारोबार च्वय्
येँ (सन्ध्या टाइम्स)/स्टक एक्सचेन्जय् थ्व वाःया लगातार निन्हुया न्हि नं बजाः परिसुचक नेप्से कुहां वःगु दु। यद्यपि वंगु छुं ई न्ह्यः निसें कुहा वयाच्वंगु शेयर न्याये-मीया लिसें दांया कारोबार नापं बजार पूँजीकरण धाःसा थहां वंगु दु। शेयर कारोबारया निन्हुया न्हि कुन्हु नं छन्हु न्ह्यःया कारोबारय् थें हे बजाः चालेवं कुहां वनेगु शुरु जूगु नेप्से कारोबारया अन्त तकं कायम जुल ।
थ्व वाःया न्हापांगु न्हिया कारोबारं बजार परिसुचक कुहां वनेवं थुगु वालय् नं थ्व क्रमं निरन्तरता काइगु शेयर बजाःया विश्लेषकतय्सं अनुमान याःगु खः। कारोबार जूगु उपसमुहया सुचकय् वाणिज्य, विकास व जलविद्युत समुहया सुचक कुहां वनेवं थुकिया लिच्वः नेप्से लाःगु खः। स्टक एक्सचेन्जया कथं बजार परिसुचक नेप्से दकलय् अप्वः ४ दशमलव ७१ अंकं कुहां वनाः ५२४ दशमलव १९ अंकय् थ्यंगु दु। वाःया न्हापांगु न्हि २ अंकं कुहां वंगु खः। सेन्सेटिभ १ दशमलव २५ अंकं कुहां वंगु दुसा फ्लोट शुन्य दशमलव ४७ अंकं कुहां वःगु दु ।
शेयर कारोबार जूगु उपसमुहय् विकास बैंक दकलय् अप्वः ६ दशमलव २१ अंकं कुहां वनाः ४९७ दशमलव ५१ अंकय् थ्यंगु दु। विकास बैंकया सुचक १ दशमलव ७५ अंकं कुहां वनाः ५८३ दशमलव ३७ अंकय् थ्यंगु दु। जलविद्युत समुहया सुचक नं १ दशमलव ८४ अंकं कुहां वयेवं ७८७ दशमलव ६६ अंकय् थ्यंगु दुसा अन्य समुहया कारोबार नं ५ दशमलव ८७ अंकं कुहां वल ।
वीमा समुह शुन्य दशमलव शुन्य ८ या सामान्य अंकं थहां वंगु दुसा फाइनान्स समुह नं शुन्य दशलव ५९ अंकं थहां वंगु दु। मेखे उत्पादन मूलक, व्यापारिक व होटल समुहपाखे छगू नं कित्ता शेयर कारोबार मजुल ।
म्हिगः न्यय्च्यागू कम्पनीया न्हय्निद्वः व निसः व पीछगू कित्ता शेयर न्याये-मी जुयाः स्वंगू करोड पीन्हय्गू लख व ख्वीनिद्वः तका दांया कारोबार जुल। छन्हु न्ह्यः निगू करोड नीनिगू लख तका दांया जक कारोबार जूगु खः ।
म्हिगः नं भिवोर विकास बैंकं दांया ल्याखं दकलय् अप्वः पीखुगू लख स्वीनिद्वः तका दांया कारोबार याःगु दु। अन्नपूर्ण विकास बैंकं अप्वः लब कमे याःगु दुसा नविल बैंकं दकलय् अप्वः द्यापं फःगु दु ।
