माओवादी रणनीति विरुद्ध वर्तमान गठबन्धन : कोइराला
नेपाली कांग्रेसया कार्यवहाक सभापति सुशील कोइरालां मेगू राजनीतक दलतय्त छखे तयाः सत्ता कब्जा यायेगु माओवादी रणनीतिया विरुद्ध कांग्रेस-एमाले सहितया नीनिगू दलया गठबन्धन गठन जूगु खँ धयादीगु दु ।
सोमवाः नेपालगञ्जय् कार्यकर्ता प्रशिक्षण ज्याझ्वः उल्लेज्या यानादिसें वयेकलं सेनाया मानोवल कमजोर यायेत व सत्ता कब्जा यायेगु माओवादी षड्यन्त्र थुइकाः हे वर्तमान गठबन्धन दयेकाःगु दाबी यानादिल । वयेकलं माओवादीं सरकारय् च्वनाः हे राज्यसत्ता कब्जा यायेत स्वःगुलिं हे माआवादी नेतृत्वया सरकार क्वःदुगु दाबी नं यानादिल ।
अथेहे वयेकलं माओवादी लडाकुयात राष्ट्रिय सेनाय् समूहगत प्रवेशया पक्षय् कांग्रेस मदुगु नं स्पष्ट यानादिल । वयेकलं सेनाया पलेसाः वन, कलकारखाना सुरक्षायय् लगे यायेफइगु विकल्प दुगु धयादिल । वयेकलं राजनीतिक लडाकुयात समूहगत समायोजन याःसा द्वन्द्व जुइगु धयादिसें तर प्रकृया थ्यंगु योग्य लडाकुयात धा:सा सेनाय् भर्ति यायेफइगु धयादिल ।
